«Сир баайын туһаныы дьэҥкэтэ суоҕа - саамай улахан иэдээн. Онтон да атын кыһалҕа үгүс», - диэтэ Ил Түмэн бэрэссэдээтэлин бастакы солбуйааччы Анатолий Добрянцев.

Компаниялар социальнай уонна экологическай өттүгэр эппиэтинэһи сүгүөхтэрин баҕарбаттар. Ити бөдөҥ эрэ компнияларга сыһыаннаах диир сыыһа. Орто тэрилтэлэргэ уонна артыалларга кыһалҕа эмиэ сытыытык турар.

Муус устар 1 күнүнээҕи туругунан, республикаҕа сир баайын туһаныыга 537 лицензия быраабы үөскэтэр. Кэлиҥҥи үс сылга манан дьарыктанар тэрилтэлэр ахсааннара ортотунан 250. Итилэртэн 30 тахсата АЛРОСА, Газпром, Роснефть, Сургутнефтегаз, Якутуголь, Алданзолото ГРК, Селигдар, о.д.а. курдук бөдөҥ тэрилтэлэр.

Бүгүҥҥү туругунан республика бөдөн компаниялары кытта 34 сөбүлэһиини түһэрсибитэ биллэр. «Уопсайынан саба быраҕан көрдөххө, сир баайын туһаҕа таһаарар бөдөҥ компаниялар сөбүлэһии усулуобуйатын толороллор», - диэтэ правительство председателин солбуйааччы Павел Маринычев.

Улахан компниялар республика тас өттүгэр регистрациялаахтара муниципальнай тэриллиилэри кытта хардарыта дьайсыыга уустуктары үөскэтэрин кини чиҥэтэн эттэ. Ону таһынан оройуоннары кытта түһэрсиллибит сөбүлэһиилэргэ лицензия дьайыытыгар хаарчахтааһын баара судургута суох быһыыны-майгыны үөскэтэр.  

ХИФУ хайа факультетын декаана Борис Заровняев этэринэн, компаниялар үгүстэрэ инженер идэлээх дьону тас дойдулартан ыҥыран үлэлэтэллэр, олохтоох эдэр дьону үлэҕэ ыларга аккаастыыллар. «Комания республика тас өттүттэн дьону ыҥырар, тырааныспарга ороскуоту уйунар, квартира биэрэр, оннуларын булалларыгар анаан үп-харчы төлүүр. Ити ороскуоту Саха сириттэн таһаарбакка, университеты, үөрэх тэрилтэлэрин өйүүргэ биэрэр ордук этэ», - диэтэ кини.

Уопсастыбаннай палаата чилиэнэ  Иван Шамаев сир баайын хостуур тэрилтэлэргэ социальнай уонна экологическай эппиэтинэстэрин сүрүннүүр сокуон бырайыага оҥоһуллубутун туһунан эттэ. Ити сокуон ылыллара республикаҕа ураты улахан суолталаах.