XXII-с кыһыҥҥы Олимпиадаҕа аттаныан иннинэ кини журналистары кытта бэйэтин былааннарын уонна эрэллэрин үллэһиннэ.

Скульптор этэринэн, Сочига барар путевка кини икки сыллаах сүрүн сыала эбит, онно маастар туох-баар күүһүн-күдэҕин, дьоҕурун анаабыт. Билигин саамай бүтэһик кэрдиискэ — кыайыы эрэ хаалла.

Александр Шадринтан ураты Сочитааҕы конкурска өссө икки Россия киһитэ, ону таһынан Япония, Кытай, Финляндия, оунна атын дойду бэрэстэбиитэллэрэ кыттыахтара.

«Күрэхтэһии тыҥааһыннаах буолара күүтүллэр, ордук күүстээх скульптордар Кытайтан уонна Японияттан кэлиэхтэрэ. Ол да буоллар сүрүн утарсааччыбынан Сочи күнүн-дьылын туругун ааттыам этэ — ол уларыйа сылдьар. Россия гран-притын бүтэһик кэрдииһэ Сочига ыытыллыбыта, онно температура +8 этэ, эбиитин ардах түспүтэ — оннук усулуобуйаҕа мууһу кытта үлэлиир олох ыарахана. Дьолго, тэрийээччилэр үлэбит кэмин хас хардыытын устан испиттэрэ, ол түмүгү таһаарарга учуоттаммыта», - диэтэ Шадрин.

Ол эрээри маастар санаатын түһэрбэт, кини бэйэтэ идэтигэр кистэлэҥнэрдээх.

Шадрин олимпийскай скульптурата спорт туһунан буолбакка, саха Олоҥхотугар ананыаҕа. Бу конкурсу тэрийээччилэр сүрүн ирдэбиллэрэ: тема олимпийскай бэлиэлэртэн уонна спортивнай сюжеттартан атын буолуохтаах.

«Миэхэ Олоҥхо быдан чугас, ол иһин таллым. Скульптура «Кийиит туһунан номох» диэн ааттаах — бу элбэх фигуралартан турар үс миэтэрэ кэриҥэ үрдүктээх композиция буолуоҕа. Мин Россия дьахталлара спорт уонна дойду иннигэр оҥорбут үтүөлэригэр сүгүрүйэбин. Бэйэм биатлон улахан сүгүрүйээччитэбин, мин биһиги хайыһардьыт дьахталларбытыттан үөрэбин», - диэн билиннэ скульптор.

Муус оҥоһуктар конкурстара Краснай полянаҕа тохсунньу 26 күнүгэр саҕаланыаҕа. Скульптураны оҥорорго икки суукка бэриллэр, тохсунньу 29 дьүүллүүр сүбэ түмүгү таһаарыа уонна кыайыылаахтары биллэриэ. Скульптуралар Олимпиада уонна Паралимпиада кэмигэр Олимпийскай дэриэбинэни киэргэтиэхтэрэ.