Кырдьык, Чурапчы оройуона ыраахтааҕы былааһын саҕана Боотуруускай улууһа диэн ааттана сылдьыбытын билэбит, истэбит. Ол гынан баран, улууска атын кыһалҕалар суохтарыгар дылы, тоҕо билигин кэлэн ити былыргы ааты эргитэн аҕаларга туох улахан ыксаллаах быһыы-майгы үөскээбитин мин сатаан өйдөөбөппүн. Чурапчы диэн тылга куһаҕан, кыбыстыылаах баарын көрбөппүн. Оннооҕор соҕотох киһи аатын уларытара олус түбүктээх дииллэр. Бүтүн улуус аатын уларытыы манан аҕай дьыала буолбатаҕа, «Чурапчы» диэн тылы сүүһүнэн тэрилтэттэн саҕалаан хас биирдии киһи докумуонугар, кумааҕытыгар тиийэ уларытыы үп-харчы өттүнэн ороскуота улахана өйдөнөр. Ити дьыала биир өттө.
Өссө саамай иэдээнэ – өйгө-санааҕа (моральнай өттүнэн) охсуута баар дии саныыбын. «Чурапчы» диэн тыл хас да көлүөнэ дьон өйүгэр-санаатыгар, сүрэҕэр-быарыгар, дууһатыгар иҥэ сылдьар. Төһөлөөх биһиги эһэлэрбит, аҕаларбыт, убайдарбыт Чурапчыларын аатын ааттаабытынан сэрии толоонугар тыыннара быстыбыта, хоту оройуоннарга күүс өттүнэн көһөрүүгэ тиийбит дьоммут-сэргэбит сатаатар аны биирдэ Чурапчыбын көрдөрбүн дии сытан хоргуйан өлбүттэрэ буолуой. Бу туһунан Д.П.Чечебутов кинигэлэригэр үгүстүк суруллан турар. Республикаҕа, атын да регионнарга үлэлии, үөрэнэ сылдьар билиҥҥи көлүөнэ ыччаттарбыт Чурапчыга төрөөбүттэрэ, манна иитиллибиттэрэ, мантан көччөх буолан көппүттэрэ. Кинилэр таптыыр-ахтар Чурапчыларын куһаҕаннык санаабаттара, кини аатыттан кыбыстыбаттара чуолкай.

Салгыыта