Киэһэни эҕэрдэнэн Хотугу олохтоох төрүт омуктар бэрэстэбиитэллэрэ астылар, ол кэнниттэн тылы республика баһылыгар биэрдилэр.

«Арктика Сылын биллэрэргэ биһиги Саха сиригэр ханнык кыһалҕалар ордук тирээн туралларынан салайтарбыппыт. Промышленнай оройуоннар бөдөҥ бырайыактары сайыннарыы нөҥүө сайдар кыахтаахтар, тыа хаһаайыстыбатынан дьарыктанар улуустар ааспыт сыллаахха сайдарга хамсааһыны саҕалаабыттара, элбэх үбүлээһини уонна инвестицияны республика киин куората Дьокуускай ылбыта. Арктика хаалбыта. Бу хайысха саамай улахан болҕомтону ирдиир, онон биһиги онон дьарыктаныах тустаахпыт, - диэтэ кини.

Республика бары күүһүн уонна кыаҕын төрүт олохтоох омуктар ураты уонна элбэх өрүттээх культураларын хараанныырга уонна хоту сир территорияларын сайдыытыгар ууруоҕа, диэтэ республика баһылыга.

Ону тэҥэ кини бииргэ үлэлээһин суолтатын бэлиэтээтэ. «Правительство ити хайдах оҥоһуллуохтааҕын чопчу билэр, ол эрээри ити былааннары кыттыһан олоххо киллэриэххэ наада. Үтүө өттүгэр уларыйыылары ситиһэргэ сомоҕолоһуу ирдэнэр,» – диэн баҕатын биллэрдэ президент.

Парламент спикерэ Александр Жирков мустубут дьоҥҥо арктика сирдэрин баһылааһыҥҥа ураты эппиэтинэс ирдэнэрин санатта.

Арктика Сыла ыытыллыытын өйүүр тыллары РФ Госдуматын депутаттара Михаил Николаев уонна Федот Тумусов, СР Атыы-эргиэн-промышленнай палаататын бэрэссэдээтэлэ  Владимир Членов, Хотугу аҕыйах ахсааннаах төрүт олохтоохтор Ассоциацияларын президентэ  Андрей Кривошапкин, Хотугу Форум эппиэттиир секретара Владимир Васильев уонна да атыттар эттилэр.

Саха сирин президенин уонна правительствотын аатыгар Россия регионнарын балһылыктарыттан, сыһыаннаах тэрилтэлэртэн элбэх эҕэрдэ уонна үтүөнү баҕарар суруктар киирдилэр.

Кинилэр бары  Арктика Сыла Саха сирин хотуну оройуоннарын сайдыыларыгар сүүнэ төһүү буоларына эрэллэрин биллэрдилэр.