Кини этэринэн, ааспыт сыллаахха навигация үлэтэ тохтубутуттан сылтаан Үрүҥ Хайа нефтебазатыгар оттукка тиийэр таһаҕас ол курдук сатаан тиийбэтэҕэ. Мууска Индигир өрүс сүнньүнэн 29 суудуналар ыһыллан, тоҥон тураллар. Олору сааскы халаан буолуор диэри хайдах быыһыыр биллибэт.  

Билиҥҥи кэмҥэ Муома улууһун Хонуутугар газоконденсаты Нижнеянскайтан аҕаларга быһаарыы ылылынна. Кыһыҥҥы суолунан таһаҕаһы тиэйии 2014 сыл олунньу 1 күнүттэн саҕаланыахтаах этэ. Итиннэр анаан «ОДЬКХ»ГУП тендер ыыппыта, ону Үөһээ Дьааҥы икки чааһынай предпринимателлэрэ сүүйбүттэрэ.
Барыта 4,8 тыһыынчаттан тахса газоконденсат оттук тиэрдиллиэхтээх. Онно массыыналар  1200 км уһуннаах суолу айанныахтаахтар.

«Өскөтүн биһиги хочуолунай хаһаайыстыбаларыгар оттугу тиэйбэтэхпитинэ, оччоҕуна аныгыскы оттук сезона ураты кыһалҕалаах буолуоҕа. Хомойуох иһин, Нижнеянскайтан биир да грамм тиэйиллэ илик. Хайдах буоларбытын билбэппит. Ыксаллаах быһыыны-майгыны биллэрэргэ уолдьаста», - диэн иһитиннэрдэ СИА-ҕа Петр Черемкин.

Бэлиэтээн эттэххэ, Муома улууһугар олунньу 4 күнүгэр ыытыллыбыт толорор былаас отчуотугар  Петр Черемкин республика правительствотын премьера Галина Данчикова  аатыгар оройуоҥҥа ЫБ биллэрэр туһунан сурук ыыппыта.  Баһылык итини таһынан олунньу 6 күнүгэр оройуоҥҥа хонтуруол быһыытынан Ил Түмэн депутаттарын кытта улахан бөлөх кэлиэхтээх, оттон нэдиэлэ бүтүүтүгэр кини прокуратура кыттыылаах мунньаҕы ыытарга күһэллэбин диэтэ.

Улуус баһылыга сэрэнэрэ сөп. Саас чугаһаан иһэр, оттон кыһыҥҥы суол муус устар 20 күнүгэр диэри үлэлиир.