Саха сирин үөрэнээччилэрин биһиги дойдубут историятыгар буолар улуу түгэҥҥэ кыттыгастаахтарын билэллэригэр ХХІІ-с Олимпиада үрүҥ көмүс призера, спорт үтүөлээх маастара, билигин Белоруссия ох саатын сүүмэрдэммит хамаандатын сүрүн тренерэ  Борис Исаченко,  ону таһынан  Россия кэлим сүүмэрдэммит охчуттарын хамаандатын техническэй бэлэмнээһиҥҥэ сүрүннүүр специалиһа, техническэй наука кандидата Сергей Волжанин, «Сахаада-спорт» Ассоциация президенэ, Россия спордун маастара, Россия ох саатын Федерациятын президиумун чилиэнэ Александр Ким-Кимэн кэлбиттэрэ көмөлөстө.

Борис Исаченко эдэр спортсменнарга 1980 сыллааҕы Москва сайыҥҥы олимпиадатыгар кыттыытын, олимпиец-спортсменнар бэйэлэрин дойдуларын чиэһин көмүскүүргэ эппиэтнэстэрин туһунан кэпсээтэ. Оттон дьиэҕэр буолар олимпиада спортсменнарга икки бүк эппиэтинэһи сүктэрэрин эттэ.  

Бу ураты уруок чэрчитинэн көҥүл тустууга  турнир уонна 1 №-дээх Покровскай оскуолатын директора Спиридон Шишигин бирииһигэр хапсаҕайга күрэхтэһии ыытылынна.
Турнир кыайыылаахтарнынан Вова Филиппов, Сережа Изотов иСаша Никифоров,  Петя Адамов, Олег Давыдов, Вова Захаров уонна Алеша Пахомов буоллулар. Алтыс уонна сэттис кылаастарга  Максим Николаев, Айаал Уйгуров уонна Данил Иванов бастаатылар.

Хапсаҕайга абсолютнай чемпионнарынан Вова Захаров (1-4 кылаастарга), Данил Иванов (5-6 кылаастарга), Данил Леонтьев (7-9 кылаастарга), Саша Алексеев (10-11 ылаастарга) таҕыстылар.

Александр Ким-Кимэн   Вова Захаровка, Алеша Пахомовка, Петя Адамовка, Данил Ивановка оттон кинилэр тренердэригэр Анатолий Петровка эдэр спортсменнары бэлэмнээбитигэр «Сахаада-спорт» дипломнарын туттарда. Үөрэххэ уонна  спортка ситиһиилэрин иһин  6 «б» кылаас үөрэнээччитэ Данил Иванов  оскуола директора Спиридон Шишигинтэн планшетнай компьютеры тутта.