Улуустааҕы дьаһалта общественноһы кытта үлэлиир сулууспатын үлэһитэ Александра Алексеева иһитиннэрбитинэн, бу күннэргэ бэйэтин үлэтин Хаҥаласка аҕыс гидропост саҕалаата. Республикатааҕы гидрометео сулууспа үлэһиттэрэ дьаһалтаны кытта анаан дуогабардаһан Өктөмҥө, Хоточчуга, Тойон Арыыга, Чкаловка, Кытыл-Дьурааҕа, Үөдэйгэ, Сиинэҕэ уонна Иһиккэ эппиэттээх дьону мунньан ыксаллаах быһыыны-майгыны таһаарбат туһугар үлэни тэрийиигэ үөрэх ыыттылар.
Бу нэһилиэктэргэ ууну кээмэйдиир анал  рейкэлэри туруордулар. Көмүөл кэмигэр сууккаҕа иккитэ уу кэмнэнэн, улуус биир кэлим диспетчерскэй сулууспатыгар тиэрдиллиэхтээх. Улуустааҕы ЫБМ отделын кылаабынай специалиһа Николай Яковлев бэлиэтииринэн, ыксаллаах быһыы-майгы үөскүүр түгэнигэр нэһилиэктэртэн эппиэттээх дьон сууккаҕа 4-тэ биллэрэ олоруохтара. Үөрэтии кэмигэр улуус бары нэһилиэнньэлээх пуунугар «Ростелеком» ААУо уонна «РСВО» ФГУП олохтоох нэһилиэнньэни сэрэтэр системаларын холбоотулар.