Күүппүт күммүт дьэ үүннэ

57 киилэҕэ барыта 44 кыттааччы баар. Үөһээ бөлөххө - 16, оттон аллараа – 28 бөҕөс киирбит. Үөһээ бөлөххө кыттааччы аҕыйаҕын ааһан, үгэс быһыытынан, састааба мин санаабар сымнаҕас соҕус. Күүстээхтэртэн грузин Владимир Хинчегашвили, монгол Эрдэнэбат Бехбаяр, японец Юки Такахаси бааллар. Ол оннугар бу ыйааһын бары күүстээхтэрэ аллараа бөлөххө түбэспиттэр. Ол курдук, турок Акгул, индус Кумар, биһиги Лебедевпит, кубинец Бонне, иранец Рахими, кореец Джанг.

Виктор Лебедев маҥнай чилиец Гуиспены кытта көрсөр. Салгыы киргиз Надырбек-кубинец Бонне кыайыылааҕар тахсара сабаҕаланар. Онон рейтинг быһыытынан саамай күүстээхтэр номнуо иккис эргииргэ көрсөр буолбуттар. Дьиҥэ кинилэри атын бөлөхтөргө араартыахха баара. Онон бу көрсүһүүнү “финал иннинэ финал” диэххэ сөп. Ол оннугар иранец Рахими сэрэбиэйэ куһаҕана суох. Бастаан - венесуэлец, онтон Лачинов, салгыы испанец, американец Рамос ... буолуохтарын сөп.

Николай Ноев сэрэбиэйэ арыый курдук, бастаан Диаттаны (Сенегал) кытта көрсөр. Кыайар ини диэн эрэх-турах сананабыт. Оттон канадеһы кытта тустуон сөп. Дьэ, манна эрчиллии быһаарыаҕа. Өскөтүн канадеһы кыайар түгэнигэр, мин санаабар, Азия оонньууларын кыайыылааҕа Джанга (КНДР) тахсар.

Дьэ, онон бу ыйааһыҥҥа үөһээ бөлөхтөн финалга Хинчегашвили, Бэхбаяр, Такахаши көрсүһүүлэрин кыайыылааҕа тахсар чинчилээх. Оттон аллараа бөлөхтөн Лебедев, Бонне, Рахими, Джанг мэтээл иһин киирсэр кыахтаахтар.

Биир эрэлбит – Айаал Лазарев маҥнай индус Сумиты кытта көрсөр. Салгыы күрэхтэһиигэ Лигети (Венгрия)-Денг (Кытай) паараларын кыайыылааҕар тахсыан сөп. Уопсайынан, уолбут бөлөҕөр грузин Гено Петриашвили, Украинаттан Ален Засеев, Азербайджантан Магомедов, монгол Жаргалсайхан курдук күүстээхтэр бааллар. Быһа холуйан эттэххэ, Айаал сэрэбиэйэ куһаҕана суох, мэтээл иһин тустуон сөп. Алта күүстээхтэр ахсааннарыгар киирэн Олимпиадаҕа путевка ылара буоллар...

Бу ыйааһын аллараа бөлөҕөр Шемаров (Беларусь), иранец Хади, россиянин Махов, казах Шабанбай, Арменияттан Берианидзе, турок Акгюль бааллар.

Мин санаабар, үөһэ бөлөхтөн финалга Петриашвили, оттон алларааттан Акгюль тахсаллара буолуо. Көрүөхпүт.

Бу күннэргэ тустууну таптааччылар, этэргэ дылы утуйар ууларын, аһыыр астарын умнан туран “күрэхтэһиинэн ыалдьа” сылдьаллар. Мин эмиэ түүннэри-күнүстэри чемпионат хапсыһыыларын Интернетинэн көтүппэккэ көрө, боротокуол оҥостон тутатына толоро, суруна, интэриэһинэй диэбит тустууларбын видеоҕа уһула, ол иһигэр тустууну таптааччыларга анаан тэрийбит конкурспун күннэтэ ырыта, бу блокка иһитиннэриилэри оҥоро сылдьар буоламмын, дьөрү телефоммун да истэр бириэмэм суох. Ону билэр дьонум баалаабаккатыгар көрдөһөбүн.          

PS: Уонна "на десерт" диэбиккэ дылы үгэһинэн түмүккэ интэриэһинэй хаартыскалары киллэрэбин.

Пьедесталга 65 кг бастыҥнара: хаҥастан уҥа Ихтиор Новрузов (Узбекистан), Франк Чамизо (Италия), Саед Мохаммади (Иран), Сослан Рамонов (Россия).

Наҕараадалааччы кыргыттар. Американецтар маннык да түгэҥҥэ бэйэлэрин олоххо ураты, хорсун көрүүлэриттэн туораабаттар.

  Чемпионат талисмана.

Аан дойду Кубогын кыайыылааҕа, Панамериканскай оонньуу чемпиона кубинец Йовлис Бонне Родригес. 

Хаартыскалар АХШ, Иран, Болгария тустууга сайтарыттан ылылыннылар.