Рафик Гаджиев – турнир бочуоттаах ыалдьыта

Кини 70-c сылларга тахсыылаахтык тустан, дойду иһинээҕи күрэхтэһиилэргэ Роман Дмитриев биир сүрүн утарсааччытынан ааҕыллара. Спорду таптааччыларга анаан Рафик Гаджиев сүрүн ситиһиилэрин билиһиннэрдэххэ маннык:  

1968 сыллаахха Рига куоракка буолбут эдэрдэр Советскай Союз үрдүнэн бастыыр иһин күрэхтэһиилэригэр бүтэһик быһаарыылаах хапсыһыыга Роман Дмитриевкэ сабырыйтарбыта. Ити 52 киилэҕэ этэ.

1969 сыллаахха Киевкэ ССРС Сэбилэниилээх Күүстэрин спартакиадатыгар азербайджанец саҥа киллэриллибит 48 кг ыйааһыҥҥа пъедестал үрдүкү үктэлигэр тахсыбыта. Эмиэ ити сылга Минскэйгэ ыытыллыбыт ССРС чемпионатыгар Р.Дмитриев уонна Ю.Кишиев кэннилэриттэн үһүс бириистээх миэстэни ылбыта. Эһиилигэр Союз чемпионатыгар кыайыыны ситиспитэ. (Бу чемпионакка Роман Дмитриев кыттыбатаҕа). Бу кыайыытынан кынаттанан аны Берлиҥҥэ буолбут Европа чемпионатыгар кыһыл көмүс мэтээли кэтэр чиэскэ тиксибитэ. Итиэннэ Ленинградка ССРС Кубогар тэҥнээҕин булбатаҕа.

1971 сыллаахха Москваҕа ССРС норуоттарын спартакиадатыгар уонна Союз чемпионатыгар иккиэннэригэр финалга Роман Дмитриевкэ хоттортообута.

Олимпийскай сылы Гаджиев Тбилиситээҕи норуоттар икки ардыларынааҕы турнирга кыайыынан саҕалаабыта. Ити ситиһиитинэн Польшаҕа буолбут Европа чемпионатыгар кыттар хамаанда састаабыгар киллэриллибитэ. Ол гынан баран табыллыбатаҕа, төрдүс эрэ миэстэнэн дуоһуйбута. Союз чемпионатын финалыгар Роман Дмитриевкэ улаханнык баһыйтарбыта.

1973 сыллаахха Европа чемпионатыгар үһүс төгүлүн кыттан, болгарин Хасан Исаевка хотторон, үрүҥ көмүс мэтээлинэн наҕараадалламмыта. Эмиэ бу сыл АХШ Толидо куоратыгар тэриллибит аан дойду бастакы кубогар хамаанданан бастаабыта, оттон биирдиилээн түмүккэ японец Акиро Кудо кэнниттэн иккис көрдөрүүлэммитэ. Гаджиев биир дьоһун ситиһиитинэн Москваҕа ыытыллыбыт студеннар аан дойдутааҕы оонньууларыгар (Универсиадаҕа) кыайыыта буолар.

1974 сыллаахха Тбилиситээҕи турнирга японец Сигео Хирата кэнниттэн иккис буолар. Ол кэнниттэн Испанияҕа аан дойду кубогар кыайыыны ситиһэр. Стамбулга ыытыллыбыт аан дойду чемпионатыгар Хасан Исаевка хотторон иккис буолар.

1975 сыллаахха Тбилиситээҕи норуоттар икки ардыларынааҕы турнирга иккис төгүлүн бастыыр. Киевкэ буолбут ССРС норуоттарын спартакиадатыгар Анатолий Хаританюк кэнниттэн иккис миэстэлэнэр.

Бу, тустуук Рафик Гаджиев спорка олоҕор бүтэһик ситиһиитэ этэ. Мантан ыла кини тустарын тохтоппута. Ааҕан көрдөххө, кини Роман Дмитриевтиин көбүөргэ биэстэ сирэй көрсөн – бэһиэннэригэр хотторуу хомолтотун билбитэ.      

Рафик Султанович билигин 67 саастаах, полиция отставкаҕа олорор полковнига.