ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Коркин турнира: бастакы күн түмүгэ

3 октября 2015, 22:59
Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы ахсыс турнир бастакы күнүгэр 57, 65, 74 уонна 97 кг ыйааһыннаахтар кыайыылааҕы быһаарыстылар.

photoByWidth&id=46186&width=1000

Быйыл омук сириттэн хамаандалар кэлиилэрэ мөлтөх. Иран, АХШ, Япония, Турция – суохтар. Бастакы ыйааһыҥҥа 28 кыттааччыттан 19-һа бэйэбит уолаттарбыт. Итиэннэ Казахстан (икки), Бразилия, Бурятия (икки), Узбекистан, Эстония уонна Таджикистан бөҕөстөрө бааллар. Монголлартан бу күн биир эрэ баатыр туһунна. Опыттаах Доржванчик Гомбодорж (74 кг) Санакоевка сабырыйтарда. АХШ-тан биир бөҕөс кэлэн кытынна. Соҕотоҕо бэрдиттэн, секундана да суох эбит.

57 киилэҕэ Россия сүүмэрдэммит хамаандатын чилиэнэ Виктор Рассадин эрэллээхтик бастаата. Кини узбек Сафаровы 10:0, бурят Балжинимаевы 8:3, бииргэ төрөөбүт быраатын Александры 12:2, бурят Гармаевы уонна финалга Эдуард Григорьевы 7:2 ахсааннарынан итэҕэтиилээхтик кыайталаата. Манна икки киилэ ордуктаах буоларын көҥүллэнэрин быһыытынан, кини сибиэһэйдик туһунна диэххэ сөп.

Өскөтүн Виктор Рассадин финалга тахсара эрдэттэн сэрэйиллибит эбит буоллаҕына, былырыын Намҥа ыытыллыбыт СР норуоттарын спортивнай оонньууларын кыайыылааҕа Эдуард Григорьев күүстээх састааптан чахчы кыайыыга дьулуурдааҕын көрдөрөн финалга таҕыста. Кини сүрдээх хатыһыылаах хапсыһыыларга бу иннинэ наар 61 кг ыйааһыҥҥа тустар Борис Семеновы, соторутааҕыта ХИФУ аһаҕас чемпионатын кыайыылааҕынан тахсыбыт Ньургун Александровы, өрөспүүбүлүкэ чемпиона Степан Соркомовы уонна Россия кубогын призера Дмитрий Аксеновы кыайталаата. Финалга даҕаны биир түгэҥҥэ Рассадины утары хамсаныыга түбэһиннэрэн, ууга-уокка киллэрэ сырытта...

photoByWidth&id=46187&width=1000

65 кг тэҥ баайыылаах уолаттар кытыннылар. Виктор Степанов финалга тахсар иһин киирсиигэ Россия чемпионатын призера Мурад Нухкадиевы кытта тустуута мөккүөрдээх буолла. Уопсайынан, Томпо ыччата кыайарын мүччү тутта. Нухкадиев син эмиэ бу иннинээҕи хапсыһыыларга курдук, атахха киирбит утарсааччыларын наар биир албаһынан (хам кууһан ылан баран, төбөлөрүн хаайан быраҕыынан) сиэтэ. Саатар ону билэр эрээри киирэн биэртэлээтилэр. Оттон Александр Контоев Украинаттан Али Алиев турнирын призера Андрей Квятковскайга 5:9 хотторон кэбистэ. Эчэйии кэнниттэн көбүөргэ саҥа тахсыбыт Владимир Флегонтов китаеһы кыайан баран, бырахсыылаах киирсиигэ Константин Власовка хоттордо...

photoByWidth&id=46188&width=1000

Мин санаабар бастакы күн саамай үчүгэй тустууну Азия чемпионатын икки төгүллээх призера Иннокентий Иннокентьев көрдөрдө. Кеша санаата көтөҕүллэн туһунна. Ыйааһыныгар төһө да кыттааччы аҕыйаҕын үрдүнэн, кини таһымнаах дьоннору кыайталаата. Ол курдук, Европейскай оонньууга бэһис буолбут дагестанец Заур Эфендиевы (Сербия) очконан, Бурятия бастыҥа Арсалан Будожаповы тиэрэ саайан ыраастык, күүс-уох өттүнэн сайдыылаах кабардинец Амин Текушевы 5:0 уонна финалга Ярыгин турнирын быйылгы призера Александр Зеленковы 10:1 ахсааннарынан кыайталаата.

97 киилэҕэ Россия кубогын призера Евгений Алексеев Греция бөҕөһүн хотон баран, уруккуттан эриһэр киһитэ Россия чемпионатын призера Азрет Шогеновы кытта киирсиитигэр кыайан иһэн, хапсыһыы бүтэрэ биэс сөкүүндэ хаалбытыгар түөрт баалга бырахтаран, кыл-мүччү хотторон кэбиһэн, тренерэ Иван Сивцеви хомотто. Ол оннугар үһүс миэстэ иһин тустууга Женя илэ бодотун тардынан киирсэн, осетин Виталий Голоевы 14:5 ахсаанынан кыайан, көрөөччүлэри астыннарда.

Балаһыанньа быһыытынан кыайыылаахтар - 3, иккистээбиттэр - 2, үһүстээбиттэр - 1 тыһ. долларынан наҕараадаланнылар. Оттон Виктор Рассадин тренерэ – Иван Дмитриев уонна Иннокентий Иннокентьев тренерэ – Будимир Яковлев эмиэ ботуччу харчынан бириэмийэлэннилэр.

Аны сарсын 61, 70, 86 уонна 125 кг ыйааһыннаахтар тустуохтара.

photoByWidth&id=46189&width=1000

photoByWidth&id=46190&width=1000

photoByWidth&id=46191&width=1000

photoByWidth&id=46192&width=1000

Д.П.Коркин кэриэһигэр норуоттар икки ардыларынааҕы турнир бастакы күнүн түмүгэ:

57 кг (кыттааччы): 1. Виктор Рассадин, 2. Эдуард Григорьев, 3. Дмитрий Аксенов (бары – Россия, Саха сирэ), Тамир Гармаев (Россия, Бурятия).

65 кг (18): 1. Мурад Нухкадиев (Россия, Красноярскай), 2. Андрей Квятковскай (Украина), 3. Александр Контоев (Белоруссия), Виктор Степанов (Россия, Саха сирэ).

74 кг (13): 1. Иннокентий Иннокентьев (Кыргызстан), 2. Александр Зеленков (Россия, Красноярскай), 3. Ацамаз Санакоев (Россия, Хотугу Осетия), Арсалан Будожапов (Россия, Бурятия).

97 кг: (8): 1. Валерий Андрейцев (Украина), 2. Азрет Шогенов (Россия, Кабардино-Балкария), 3. Евгений Алексеев (Россия, Саха сирэ), Игорь Овсянников (Россия, Красноярскай).  

Просмотров: 870 Комментариев: 0 Автор: Петр Павлов
Стиль и орфография автора сохранены.
Мнение автора может не совпадать с мнением редакции.

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ