Ойуунускай аата үйэлэргэ ааттаныа туруоҕа

Бэҕэһээ Тааттаҕа улуу убайбыт Былатыан Ойуунускай тэрээһиннэригэр «Саха сирэ» хаһыат аатыттан кыттыыны ылан кэллибит. Дьоро киэһэ олус табыллан, өрөгөйдөөхтүк ааста. «Таатта» хаһыат көҕүлээһининэн, «Сахамедиа» өйөбүлүнэн Ойуунускай 120 сылыгар анаан-минээн үлэлэр күрэхтэрин тэрийэн, ол түмүгүн эҕэрдэ дипломнары, сертификаттары туттардыбыт. Талба Таатта талыы дьоно талааннарын чахчы арыйан, дуоһуйан астынан кэллибит.

Былатыан Ойуунускай саха судаарыстыбаннаһын төһүү күүһэ буолбут «Манчаары» хаһыакка маҥнайгы нүөмэрдэригэр суруйбут ыстатыйалара кинини өссө политическай обозреватель быһыытынан сыаналыахха сөбүн туоһуулур.

Чөркөөххө Судаарыстыбаннас музейыгар сылдьан истибит биир түгэни кэпсиим. 50с. сылларга Ойуунускай аата иккистээн тиллээтин кытта, араадьыйаттан , хаһыаттан итин сонуну тута истээт биир ыал аҕа баһылыга (хомойуох иһин ааттарын өйдөөбөппүн) мастан кыһан анаан-минээн панно оҥорбут. Ол аата оччотооҕуга төһө да улуу киһибит аатын араастан киртитэ сатаабыттарын үрдүнэн, дьон-сэргэ ортотугар кини Киһи Киһитэ буолан үтүө аата харыстана сылдьыбыт. Дэлэҕэ да эппэтэх буоллаҕа: “Үс саха төрүөҕэр үөрүүлээх күнүгэр, мин ырыам ылланыа, мин аатым ааттаныа...”.

Ытык-Күөлгэ айаннаан иһэн Дьулуруйар Ньургун Боотур пааматанньыгын көрөн, олус да астынным. Таатталар маладьыастар. Саха норуотугар дириҥ силистээх-мутуктаах буоларбытын санатар, дуоһуйунуу, бэйэ норуотунан киэн туттууну көҕүлүүр итинник кэрэ бэлиэ сирдэр, монуменнар, пааматанньыктар элбии турдуннар. Дьоллоох Туймаада туонатыгар эмиэ итинник курдук пааматанньык турарын баҕардым.