"Бу көрсүһүү массыына суоллаах Өлүөнэ өрүһү туоруур муостаны тутуу бырайыагын олоххо киллэрии хаамыытын дьүүллэһии көһө сылдьар мунньаҕын иһинэн буолла», - диэн Г.Данчикова секретариатыттан СИА-ҕа иһитиннэрдилэр.

2014 сыл кулун тутар 28 күнүгэр муостаны тутуу аһаҕас куонкуруһугар«Транспортные Концессии (Саха) – банк «ВТБ» ХЭТ, «ВТБ Капитал», УСК «Мост», «Стройпроект» институт, Бамстроймеханизация кыайыылааҕынан ааттаммыттара.  

«ВТБ баан» ХЭТ вице-президенэ  Юрий Молчанов бу көрсүһүүгэ өрүһү туоруур муоста 2014 сыллааҕы концессионнай куонкурустартан биирдэстэрэ буоларын эттэ. «Бырайыак судургута суоҕун, тутуу ыарахан климатическай усулуобуйаҕа барыаҕын билинэбит», - диэтэ кини.Галина Данчикова муоста тутулларыгар сүрүн болҕомто хаачыстыбатыгар ууруллуохтааҕын эттэ. СР Правительствотын уонна «Транспортные  Концессии (Саха)» ХЭТ хардарыта түһэрсэр сөбүлэһиилэрин сүрүн өрүттэригэр тохтоотулар. Республика премьер-миниистирэ  олохтоох дьон үлэлииллэрин уонна экология боппуруостарын өрө тутта. Кини этиитин Юрий Молчанов өйөөтө уонна ВТБ баан быһаарыыта барыта аһаҕаһын уонна дьэҥкэтин уонна ол туохтааҕар да инники күөҥҥэ тутулларын бэлиэтээтэ.

Өлүөнэ өрүһү туоруур муостаны тутуу туһунан кэпсэтиһии, ырытыһыы өссө АЯМ магистралын тутуу саҕаттан баар. 2000 сылларга Беркакит – Томмот – Дьокуускай тимир суол тутуллуутугар бу өссө сытыырхайбыта. 2006 сыллаахха буолбут ырытыһыыга уопсастыбаннас көхтөөхтүк кыттыбыта. Маныаха бу тутуу социальнай-экономическай уонна экологическай дьайыытыгар болҕомто ууруллубута. Уопсастыбаннай истии түмүгүнэн тутуу тырааныспар сайдыытыгар ураты улахан суолталааҕа этиллибитэ.

СР Правительствотын көҕүлээһининэн Россия тырааныспарга министиэристибэтин кыттыытынан экспертнэй сэбиэт мунньаҕар муостаны тутуу икки барыйаана дьүүллэһии үөһүгэр турбута. Биир барыйаан — тимир суоллаах муоста, иккис — Аллараа-Бэстээх — Дьокуускай хайысханан тоннель тутуута.

Экспертнэй сэбиэт түмүгүнэн тутуу геологическай, геокриологическай,  сейсмическэй, гидротехническэй,  градостроительнай, экологическай уонна экономическай усулуобуйата уонна үлэҕэ киллэриитэ аахсыллан, тимир суоллаах муоста барыйаана талыллыбыта.

РФ Правительствота Дьокуускайга тиксиһиннэрэ муостаны тутуу туһунан концессионнай сөбүлэһиини түһэрсэр туһунан быһаарыыны 2013 сыл муус устар 2 күнүгэр ылбыта.