Галина Данчикова өрөспүүбүлүкэ бырабыыталыстыбата ааһан эрэр сылга тугу ситиспитин, кэлэр сылга туох соруктары туруорарын туһунан кэпсээтэ.

2015 сылга Аҕа дойду Улуу сэриитигэр Кыайыы 70 сылын дойду бүтүннүүтэ бэлиэтиэҕэ. Бу бэлиэ күҥҥэ ураты улахан болҕомто ууруллуоҕун Галина Данчикова чиҥэтэн эттэ.

Саха сирин баһылыгын 2014 сыл балаҕан ыйын 3 күнүнээҕи ыйааҕынан 2015 сыл Бэтэрээн сылынан биллэриллибитэ.

Галина Иннокентьевна маныаха туһуламмыт үлэҕэ Ытык Сүбэ күүрүүлээхтик ылсарыгар этии киллэрдэ.

"Бэтэрээн сылыгар ким да болҕомто, кыһамньы тас өттүгэр хаалыа суохтаах. Онно Ытык Сүбэ күүс-көмө буолуо диэн бигэтик эрэнэбин", - диэтэ кини.

"Үүнэр көлүөнэни патриот тыыныгар иитиигэ эһиги килбиэннээх, бэриниилээх үлэҕит, улахан уопуккут чаҕылхай холобурунан буолар. Ыччаппыт аҕаларын, эһэлэрин хорсун-хоодуот быһыыларын, Улуу Кыайыы, эйэлээх олох хайдахтаах курдук сыананан ситиһиллибитин билиэх тустаах", - диэтэ Галина Иннокентьевна.

Үүнэр көлүөнэни патриот тыыныгар иитии боппуруоһа сытыытык турда. Патриотическай иитии инники кирбиигэ тутулларын, ол эрээри, олоххо дьиҥнээх туһаныллыыта дуона суоҕа долгутарын Ытык Сүбэ чилиэннэрэ аһаҕастык эттилэр.

Галина Данчикова  кинилэр ити этиилэрин кытта сөпсөстө уонна государственнай тэрилтэлэр, уопсастыбаннай үөскээһиннэр күүстэрин-кыахтарын түмэри, үлэни сүрүннүүрү болҕомто үөһүгэр тутар наадалааҕын ыйда.

Өрөспүүбүлүкэҕэ оҕо хамсааһынын тэрийии, бу тула үлэни күүһүрдүү Галина Данчикова уонна Ытык Сүбэ чилиэннэрин кэпсэтиилэригэр болҕомто киинигэр турда. Кэпсэтии аһаҕас уонна туһалаах буолла.

Оҕо дьиэлэригэр, оҕону иитэ ылар дьиэ кэргэннэр, олорор дьиэ, культура үлэһиттэригэр социальнай мэктиэлэр, доруобуйа харыстабылын, тыа хаһаайыстыбатын, о.д.а. баар кыһалҕалары туоратыыга бэтэрээннэр бэйэлэрин этиилэрин киллэрдилэр.

Ытык Сүбэ бэрэссэдээтэлэ Люлия Григорьева  чиэһинэй уонна аһаҕас кэпсэтии иһин Галина Данчиковаҕа махтанна, кэлэн иһэр Саҥа Дьылынан эҕэрдэлээтэ.

Премьер-миниистир Саха сирин бырабыыталыстыбата уонна Ытык Сүбэ үрдүкү сэбиэтин чилиэннэрэ инникитин хардарыта дьайсан, биир санаанан салайтаран үлэлиэхтэригэр бигэ эрэлээҕин биллэрдэ, кэлэн иһэр бырааһынньыгынан эҕэрдэлээтэ. Ити туһунан СИА-ҕа бырабыыталыстыба бэрэссэдээтэлин секретариатыттан иһитиннэрдилэр.