Россия почтата тэрийэр «Биир дойдулаахтарыҥ махтала» акциятыгар Кыайыы күнүгэр 700 тыһыынчаттан тахса эҕэрдэни Аҕа дойду Улуу сэриитин уонна тыыл бэтэрээннэригэр тиэрдиэхтэрэ. Бу РФ Президенин эҕэрдэтин кытта үөрүүлээх быһыыга-майгыга туттарыллыаҕа.
Почта үлэһиттэрэ сэрии, тыыл бэтэрээннэрин эҕэрдэлиир этиини муус устартан ыла саҕалаатылар. Почта сибээһин бары отделларыгар бэлиэ күҥҥэ анаммыт открыткалары уонна кэмбиэрдэри булуохха сөп. Ыытааччылар бэтэрээн аатын, аадырыһын булгуччу билэллэрэ ирдэммэт. Ыам ыйын 9 күнүгэр диэри эҕэрдэни аадырыһынан тиэрдэргэ почта үлэлиэҕэ.
Камчаткаттан Калининградка диэри, Уһук Хоту сиргэ уонна Кавказка, Поволжьеҕа уонна Сибииргэ бу акцияҕа үгүс киһи кыттыһыаҕа. Махтал тылларын быйыл Крым олохтоохторо аан бастакыларын туттулар. Открыткаларга уонна суруктарга нэһилиэк, оройуон, куорат дьаһалталарын бэрэстэбиитэллэрэ, балыыһа, ЫБМ үлэһиттэрэ, байыаннай училищелар иитиллээччилэрэ, студеннар, оскуола үөрэнээччилэрэ, уо.да. илии баттаатылар.
2014 сылга акция үһүс төгүлүн ыытыллар, сылын аайы бу саҕалааһыҥа саҥаттан саҥа тэрилтэлэр кыттыһаллар. Красноярскай кыраайга автопробег, Севастополь куораты кытта телемост, Удмуртияҕа уонна Чувашияҕа филателистическай быыстапкалар, Псков, Грознай, Липецк, Калуга, Краснодар куораттарга байыаннай почтальоннар тустарынан кэпсээннээх хорсун санаа уруоктара, Хакассияҕа, Брянскайга, Хабаровскайга, Ингушентияҕа, Тюмеҥҥэ, Рязаҥҥа Иркутскай авиационнай собуокка оҥоһуллан тахсыбыт, Ер-2 самолету оҥоруу 70 сылыгар анаммыт пресс-турдар, п, о.д.а. тэрээһиннэри почта үлэһиттэрэ көҕүлээтилэр.
Кремль таһыгар акция сүрүн тэрээһинэ буолуоҕа. Албан аат аллеятыгар почты үлэһиттэрэ өйдөбүнньүк открыткалары бэтэрээнэргэ бэлэхтиэхтэрэ. «Биир дойдулаахтарыҥ махтала», «Георгиевскай лиэнтэ» социальнай акциялар Москва главпочтамыгар ыытыллыахтара.
Үгэс быһыытынан оскуола үөрэнээччилэрэ саамай көхтөөх кыттааччылар. Кинилэр суруктарын үс муннуктуу тутан почта үлэһиттэрин кытта бэтэрээннэргэ биэриэхтэрэ. Саха сиригэр алын кылаас үөрэнээччилэрэ открыткалары бэйэлэрэ уруһуйдаатылар, оҥордулар. Кемерово Юрга к. 8-с №-дээх оскуолатын үөрэнээччилэрэ акция чэрчитинэн биэриилэри бэлэмнээн, оскуола радиотыгар таһаардылар.
2012 сыллаахха «Биир дойдулаахтарыҥ махтала» акция почта 25 филиалыгар эрэ ыытыллыбыта. Онно 3000 эҕэрдэ бэтэрээннэргэ тиэрдиллибитэ. 2013 сыллаахха акция дойдуну бүттүннүүтүн хаппыта.
Комментарии
Авторизация на сайте через социальные сети