«Ким да умнуллубат, туох да умнуллубат» холбоһуктаах бырайыакка сэрии, тыыл бэтэрээннэрин санаан-ахтан аастылар. Олохтоох дьаһалта, оскуола, кулууп үлэһиттэрэ уонна олохтоохтор бүттүүн турунан, тэрээһин бэрт сэргэхтик ааста.

Семен Андреев салайар «Бригантина» оскуола оҕолорун байыаннай-патриотическай көрдөрүүлэрэ сэҥээрини ылла. Ону сэргэ Дьокуускайга олорор биир дойдулаахтара бэйэлэрин программаларын илдьэ кэлэн көрдөрдүлэр.

Ол курдук, отставкаҕа олорор офицер, Афганистаҥҥа бойобуой дьайыылар кыттыылаахтара, «Кыһыл Знамя» орден кавалера, СӨ норуотун хаһаайыстыбатын үтүөлээх үлэһитэ, Сунтаар улууһун уонна Кутана нэһилиэгин бочуоттаах олохтооҕо Усементай Алексеевтыын көрсүһүү буолла. Маны сэргэ Усементай Николаевич «Патриот» диэн общественнай тэрилтэ көҕүлээһининэн Сунтаар улууһугар үһүс төгүлүн ыытыллар байыаннай-спортивнай күрэхтэһиигэ кытынна.

Дьокуускайга олорор, СӨ культуратын туйгуна Фатина Иванова «Баар буолууй» айар концерыгар Аҕа дойду Улуу сэриитин уонна үлэ фронун кыттыылаахтарын оҕолоро, сиэннэрэ, аймахтара кытыннылар.

Фатина Иванова бэйэтин матыыбыгар, биир дойдулааҕа Николай Федоров тылларыгар «Мэтээлгин кэт, бэтэрээн» ырыатыгар устубут клибын долгуйа көрдүлэр. Манна даҕатан эттэххэ, клип сүрүн геройунан билигин Дьокуускайга олорор биир дойдулаахтара, сэрии бэтэрээнэ Василий Александров буолар.

Кутана нэһилиэгин бочуоттаах олохтооҕо, ГК «Розтор» холбоһук ситимин салайааччыта Антонина Алексеева өрөспүүбүлүкэҕэ киэҥник биллэр «Розтор» 20 сыллаах юбилейыгар анаммыт слайды билиһиннэрдэ.

Куораттан кэлбит ыалдьыттар холбоһуктаах дьаһал үрдүк таһымнаахтык уонна түмсүүлээхтик барбытыгар тэрийээччилэргэ, олохтоохторго улахан махталларын тириэртилэр.