Хайыһардьыт, спортивнай бинтиэпкэнэн кыраҕытык ытар, баскетбол мээчиги таба күөрэтэр, саахыматчыт, теннисист кыыһы олоҕун аргыһын кытары спорт билиһиннэрбитэ. Спорт уһуйбут дьаныардаах, дьулуурдаах, тулуурдаах майгыта кэлин иистэнэр дьарыгар эмиэ улаханнык көмөлөспүтэ. Ол курдук, Лидия Егоровна хараҕар таба көрүө, илиитигэр ылыа эрэ кэрэх, түмүгүн көрөн эрэ баран дуоһуйар иистэнньэҥнэр ахсааннарыгар сылдьар. Маастар кумааҕыттан, соломоттон, балык тириититтэн, балык уонна таба уҥуохтарыттан тугу-тугу оҥорботоҕой?

"Холобур, таба уорганын барытын туһанабын. Таба уҥуоҕун лобзигынан эрбээн, өр да өр аалан, оргутан баран дуобат, саахымат оҥоробун. Туйаҕын эмиэ оргутан лыҥкынас тыастаах музыкальнай инструмент эбэтэр куһаҕан санааны киэр кыйдыыр харысхал бэлиэ оҥоробун. Дьахтар түөһэ тоҥмотун диэн түөскэ кэтиллэр түһүмэҕи оҕуруоттан тиһэбин. Түһүмэх тымныыттан харыстыырын сэргэ киэргэл курдук көһүннүн диэн сэттэ араас өҥү, сүрүннээн кытаран көстөр күөх (фиолетовай) өҥү туһанабын", - диир норуот маастара.

"Балык уҥуоҕуттан оҥорбут оонньуурдарбын оҕолор хаарга эбэтэр остуолга быраҕа оонньууллар. Онон айылҕа матырыйаалын тугу да сыыска-буорга түһэрбэппин. Хас биирдии оҥоһук бэйэтэ суоллаах-иистээх, тугу эрэ кэпсиирдээх. Бу үлэ туох да уустуга суох. Төрөөбүт дойдугун харыстыыр, сөбүлүүр буоллаххына, айар-тутар оҥоһугуҥ барыта сатанар", – дии-дии тарбаҕар талааннаах маастар Лидия Алексеева дьэрэкээн оҥоһуктарын биир-биир көрдөрөр. Хас биирдии оҥоһугун илиитигэр ыллаҕына, хараҕа уратытык уоттанар, оҕолуу истиҥник мичээрдиир.

Кэргэнэ Василий Семеновичтыын оскуола оҕолоругар тугу сатыылларын барытын үөрэппиттэрэ. Хоту сир оҕотун айылҕаттан бэриллибит кыраҕы өйүн, ылынымтыа майгытын уһугуннарбыттара уонна олохтоохтук иҥэрбиттэрэ. Лидия Егоровна үөрэнээччилэрэ кус, хабдьы, хаас, куоҕас куорсунуттан сөрүүкэтэр дэйбиирдэри, оҕолорго аныгы киэргэллэри, паннолары, сувенирдары оҥоруу кистэлэҥнэрин арыйаллар. Маастар уонна кини үөрэнээччилэрин бастыҥ оҥоһуктара Россияҕа, Латвияҕа, Эстонияҕа быыстапкаларга туруоруллубуттара.

Лидия Егоровна 40-ча сыл устата мунньуммут билиитин түмэн, 3 кинигэни, 2 альбому ыччаттарга анаан таһаартарда. Ону таһынан прикладной искусство араас көрүҥэр 3 программаны оҥордо. Ол да иһин, норуот маастарын үөрэнээччилэрэ уонна төрөппүт оҕолоро (2 уол, 1 кыыс оҕолордоох) кэлин: «Биһигини хаһаайка уонна ыал аҕатын быһыытынан элбэххэ үөрэппит, олоххо бэлэмнээбит эбиккит. Эн көмөҕүнэн кийиит уонна күтүөт быһыытынан сириллибэтибит», – диэн махтаналлара элбэҕи этэр.