«Улахан хара уонна саһархай «иномарка» массыыналарынан сылдьалларын Уус-Алдаҥҥа полицейскайдар туппуттар үһү», «Аммаҕа оҕону уоран баран, куотан иһэллэрин туппуттар үһү», «Бүлүүттэн үүрүллэн кэлбиттэр, элбэх баҕайылар үһү» диэн туустаммыт-тумаламмыт «сонуннар» түргэнник тарҕана охсубуттар. Бу сурахтар төһө оруннаахтарын полиция уорганнарыттан токкоолостубут.

Мария Миронова, РФ ИДьМ-тын Саха Республикатыгар министерствотын пресс-сулууспатын начальнигын солбуйааччы: 

-- Цыганнар Амма улууһугар ыам ыйын 8 күнүгэр чахчы сылдьыбыттар. Биэс массыынанан. Ол эрэн, оҕону уоран иһэн тутуллубуттар диэн сурах оруна суох. Трассаҕа массыыналара алдьанан тохтообуттарын, дьон көрөн полицияҕа тыллаабыт. Полиция тиийбитигэр, Магадаҥҥа айаннаан иһэн, мунаннар, Аммаҕа тиийбиттэрин быһаарбыттар. Цыганнар «Дружба» эрбии, кытай суотабай төлөпүөнүн дьоҥҥо атыылыы сатаабыттар да, тугу да атыылаабатахтар. Дэриэбинэҕэ киирбэтэхтэр, массыыналара оҥоһуллуор диэри суолга хоммуттар. Амма полицейскайдара кинилэри Амматтан 10 км сири арыаллаан таһаарбыттар.

Оттон Уус-Алдаҥҥа ыам ыйын 13 күнүгэр тиийбиттэр. Бороҕоҥҥо эмиэ эрбиилэрин, төлөпүөннэрин атыылыы сатаабыттар. Олохтоох полиция кинилэри бэрэбиэркэлээбит – российскай паспордаахтар эбит. Туох да кэһиини оҥорботох буоланнар, кинилэри тутарга төрүөт суох. Салгыы Магадаҥҥа айаннаабыттар.