95-с №-дээх федеральнай сокуонунан болдьоҕу иннинэ куоластыырга дьон аны быыбар хамыыһыйатын дьиэтигэр-уотугар тиийэр бырааптаннылар. Бары билэрбит курдук, урукку өттүгэр дастабырыанньанан (открепительные удостоверения) эрэ куоластыыр этибит.

Быыбар киин хамыыһыйатын председателэ Анатолий Кривошапкин быыбар күнэ ананыан иннинэ ити уларыйыы күүһүгэр киириэхтээҕин туһунан эттэ. Онон, норуот депутаттара киһи конституционнай быраабын кэспэт туһугар, уочарата суох пленарнай мунньаҕы ыытыахтаахтар. Ылыллыбыт сокуону государственнай хаһыаттарга бэчээттээн таһаарыахтаахтар, ол эрэ кэнниттэн быыбар саҕаланыахтаах.

Государственнай Мунньах (Ил Түмэн) уочарата суох пленарнай мунньах буолар кэмин ыам ыйын 27 күнүгэр диэн быһаарда.