«Бырагыраама үс сыл болдьохтоох. Олоххо киирбэккэ хаалбыт урукку өттүгэр түһэрсиллибит контрагы толорорго уонна газ систиэмэтэ эрэллээх буоларыгар, кутталы үөскэппэтигэр  ураты болҕомтону ууруохпут», - диэтэ тэрилтэ салайааччыта. Ыам ыйын 21 күнүгэр правительство председателэ  Галина Данчикова маныаха анаммыт дьаһала тахсыбыта.

Промышленность миниистирэ эппитинэн, газ тиһигэ үс сүрүн хайсханан: Бэрдьигэстээх, Бороҕон уонна Ытык-Күөл диэки оҥоһуллар.

Олоххо киирбэккэ хаалбыт контрактар туолалларын туһугар Төҥүлү-Тумул,  Табаҕа-Чурапчы-Ытык-Күөл газ тиһигэ тардыллыаҕа. «Бэдэрээччиттэрбит үлэни улаханнык харгыстаабыттара. Үп-харчы суоҕар кыһарыйтаран тутуу болдьоҕо тохтубута. Ол түмүгэр саҕаламмыт үлэ тиһэҕэр диэри тиийбэтэҕэ. Урукку өттүгэр түһэрсиллибит контрактар сорохторо букатын да туолбакка тураллар. Аукцион бэрээдэгэ киириитэ итиниэхэ улахан оруолламмыта. Буоларын курдук, саамай чэпчэки сыананы эппит бэдэрээччит кыайыылааҕынан тахсар. Сыананы ити курдук аһары намтатыы түмүгэр үлэ оҥоһуллубат балаһыанньата тыҥаабыта. Кинилэртэн сылтаан ордук гааһы кэтэһэр дьоҥҥо охсуулаах буолла. Ити саамай куһаҕана» , - диир миниистир.

Сотору кэминэн тутуллуохтаах «Сила Сибири» газ турбатын тутууга Андрей Панов  улаханнык эрэнэр. "Газпром уонна Кытай икки ардыларыгар сөбүлэһии түһэрсиллиннэҕинэ, тутуу саҕаланнаҕына, турба ааһар сириттэн чугас уонна газ үөскээбит сирдэригэр «күөх төлөн» тиийэрин туруулаһыахпыт. Ити Өлүөхүмэ, Ньурба, Алдан улуустара", - диэтэ Панов.

Олохтоох бэйэни салайыныы уорганнарыттан киирэр туруорсуулары, этиилэри барытын ааҕыстахха, гаастааһыҥҥа быһа холуйан 30 млрд солк. наада. Саха сирэ уустук суоллаах-иистээх, ыраах сирдэргэ гааһы тиэрдэр кыаҕа билиҥҥитэ суох. Ити үп-харчы бюджеттан ылылыннаҕына, ороскуот хас эмэ бүк улаатарыгар тиийэр. «Газ тардыллыахтаах нэһилиэнньэлээх пууна төһөнөн ыраах да, соччонон ороскуот улаатар. Тутуу да, инникитин газ иһин төлөбүр да сыаната үрдүүрүгэр тиийэр. Нэһилиэнньэ ити сыанатын уйунуо суоҕа. Гаастааһын — бу социальнай суолталаах бырайыак, ити олоххо киириитигэр правительство кыаллары, сатанары барытын оҥоруоҕа», - диэтэ Панов.

Республика быһылыгын э.т. кытта ыам ыйын 13 күнүгэр буолбут быһа эфиргэ бу туһунан Егор Борисов маннык диэбитэ:

"«АЛРОСА» АК акцияларын атыытыттан киирбит үбү-харчыны гаастааһын саҥа бырагырааматыгар анаатыбыт. Таатта, Уус-Алдан диэки газ тиһигин тардар үлэни салҕыахпыт. Горнайга үлэ салгыы барыаҕа. Саҥа бырагыраамаҕа киирбит Бүлүү бөлөх улуустарын бөһүөлэктэригэр газ тиэрдиллиэҕэ. Нам, Дьокуускай сиринэн-уотунан, Өлүөнэ өрүс аннынан барар газ турбатыгар куттал суох буолуутун хайаатар да хааччыйыахпыт. Онуоха үп-харчы тыырыллыбыта", - диэбитэ Егор Борисов.