Саха итэҕэлинэн субу күн Иэйэхсит Хотун үөһэттэн сиргэ түһэр. Ол иһин кинини көрсүһүү күнэ аатырар. Иэйэхсит Хотун сиргэ түһүүтүнэн сибээстээн сайыны көрсөллөрө. Бу көрсүһүү сиэрэ -туома айылҕаны харыстааһыны кытта ыкса сибээстээх.

Иэйэхсит Хотун бэрт чэбэр, ыраас, кэрэ дьүһүннээх хотун. Кини дьиэ -уот таһыгар, сиргэ-дойдуга кир-хох, бөх -сыыс сыстарын сөбүлээбэт. Ол иһин бу күнү көрсө ыаллар олорор дьиэлэрин таһын, кыстаабыт өтөхтөрүн таһын ыраастыыллар. Балаҕан, хотон сыбахтарын хоҥнорон, киилэрин уматан күөх буруону унаардаллар, малааһын тэрийэллэр. Бу күн Иэйэхсит {отун сылаас тыына, үтүө баҕата киһини барытын эйэҕэс, иһирэх санаалыыр. Кини үөрүүнү-көтүүнү, дьолу -соргуну араҥаччылыыр, куһаҕаны, кирдээҕи киэр тибэр.

Алгыс Уйбаан Иэйиэхситтиин ситимниир, илгэлээх сайыммытын түстүүр күөххэ үктэнии алгыһын иҥэринээри Өксөкүлээх Өлөксөй аатынан норуоттар доҕордоһууларын дьиэтигэр сахалыы таҥастаах дьон тоҕуорустулар.

Орто туруу дьаҕыл дойду Олоҕун чэпчэтээри,
Урааҥхай удьуора
Уйгутун дэлэтээри,
Сиэрин –туомун ситэрэн,
Силик хоһоон тэнитэн,
Тойук ырыатын торумнаан,
Дуоралдьыта алҕаан,
Ытык алгыс ылар күммүт
Үүннэ эбит доҕоттоор!

Алгыс кэнниттэн дэлэй оонньууну тэниттилэр, ырыа-тойук, үҥкүү-битии үлүскэннээҕэ саҕаланна, оһуохайы оройуттан туттулар.

Кыттыыны ыллылар Саарын, Хотун Арылы, Кыталы Куо, Мирослав Егоров, «Сандал», «Сир симэҕэ» үҥкүү бөлөхтөрө, «Сайсары», «Эҕэрдэ» ырыа кэлэктиибэ. Кэлбит дьон күөххэ алгыһынан арчыланан үктэннилэр, алаадьы, кымыс иһэн санаалара көнньүөрдэ.