Бырааһынньык ис дьиҥэ былыр-былыргыттан уларыйбат. Кыһыҥҥы унньуктаах уһун утуйуу, улугуруу кэнниттэн айылҕа уһуктар. Бу күннэргэ эбэҥкилэр аймахтарынан, уустарынан мустаннар былыргы сиэри-туому толороллоро, сыбаайбалары оҥороллоро. Бырааһынньык хас эмэ күн устата салҕанара.

Төһө да аныгы эбэҥкилэр көһө сылдьан олохсуйбатахтарын да иһин, урукку үгэс үксэ оннунан хаалбыт. «Имты» сиэргэ-туомҥа эр дьон, дьахтар баһыйар үксэ уоту аһаталлар. Уот иччитэ бултуйууну, дьиэ кэргэҥҥэ дьолу-соргуну түстүүрүгэр көрдөһөллөр. Көрдөһүүлэрин кинилэр иһиллэр, иһиллибэт гына чуумпутук эбэтэр букатын истэригэр этиэхтээхтэр.

Саҥа дьылы көрсүү ыраастаныы сиэриттэн-туомуттан саҕаланар. Манна кыттар дьон тиит маһы булан ортотунан хайыталлар. Уонна хайдыбыт сиргэ маһы кыбыталлар. Ол хайаҕаһынан киһи симиллэн тахсыахтаах уонна иччигэ үтүөнү көрдөһөн үҥүөхтээх.

Буруолатыы, бэлэх бэрсии, о.д.а. курдук сиэри-туому толороллор.

1994 сылтан ыла Иенграҕа бырааһынньык ыытыллар. Эбэҥкилэр бырааһынньыгы тилиннэрбиттэриттэн, эргиппиттэриттэн олус үөрэллэр. Кэнсиэр, футболга, волейболга, наартаны ойууга, о.д.а. күөн көрсөллөр.