«Тыа хаһаайыстыбатын сайыннарыы тус сыаллаах бырагыраама олоххо киириитин бэрэбиэркэлиир туһугар Ленскэйдээҕи прокуратура бэрэбиэркэни ыыппыт. 2013 сыл балаҕан ыйын 9 күнүгэр оройуоннааҕы тыа хаһаайыстыбатын управлениета уонна үүт собуотун саҥардыыга уонна саҥа оборудование атыылаһарга сөбүлэһиини түһэрсибиттэр. Онно анаан 2 650 000 солк. көрүллүбүт», - диэтэ Саха сирин прокурорун көмөлөһөччүтэ Геннадий Долганов.

Сөбүлэһии чэрчитинэн «Ленскэй оройуона» муниципальнай тэриллии бюджетыттан аналлаах тиэхиньикэни атыылаһыыга (ол иһигэр тырааныспар ороскуота) сыананы толуйууга анаан үп-харчы биэрбит. Субсидиянан туһанааччы үбү-харчыны тутууну туоһулуур тустаах докумуоннары бэлэмниэхтээҕэ.

1 мөл. солк. суумалаах үп-харчы собуоту саҥардыыга буолбакка, эргииргэ барбыт. Ол эбэтэр, аналыннан туттуллубатах.

Ленскэй прокуратурата үүт собуотугар уонна тэрилтэ салайааччытыгар администартивнай быраабы кэһии дьыалатын тэрийдэ. (РФ КоАП 15.14 ыст. бюджет үбүн-харчытын атын сыалга туттуу). Бэрэбиэркэ түмүгүнэн собуот дириэктэрэ 20 тыһ.солк., оттон тэрилтэ 53 тыһ. 617 солк. ыстарааптаммыт.