Сылгы уопсай ахсаана — 3747 төбө, итинтэн биэтэ — 1862, 754 сылгы эбии аһылыкка турар. Таба ахсаана — 2269 төбө, тыһыта — 690. Билигитэ 2973 тонна оттоохпут, 23 тонна комбикорма, 28 тонна уотурба баар. Бүгүҥҥү күҥҥэ итинник көрдөрүүлээх кыстыгы туораан эрэбит.

Эбии аһылык аҕалыллар. Ол курдук, бу күҥҥэ 20 тонна эбиэс кэлбитин 10 тонната Өлөөкө Күөлүгэр тиэрдиллиэхтээх, 10-на Сылгы Ыытарга уонна Ойуһардаахха наардаммыт. Эрдэтээҥҥи хаһаастан атын да нэһилиэктэргэ тиэрдиллиэҕэ. Эбии 50 тонна комбикорма быйыл кэлэрэ былааннанар.

Былырыыноттооһуҥҥа былаан туолбута эрээри, кэккэ нэһилиэктэргэ окко наадыйыы баара билиннэ. Ол курдук, Арҕахтаах Өлөөкө Күөлтэн 25 тонна атыылаһар кэпсэтиилээх. Ол төрүөтүнэн — сылгылаах хаһаайыстыбалар ааспыт сыл оттообокко, быйыл ыарахан кыстык тирээбитинэн, окко наадыйбыттар. Ол иһин атыылаһарга күһэллибиттэр. Бу курдук балаһыанньа Налимскайга баар. Куорат резервэтэ эмиэ сылгылаахтарга бэриллибит.

Бу сылга үктэнэн баран Арҕахтаахха 3 ынах төрөөн баран өлбүт. Бу күннэргэ управлениеттан уонна ветеринарияттан хамыыһыйа тахсан миэстэтигэр үлэлээбит, өлбүт сүөһү аналиһын Дьокуускайга ыыппыттар, ону кытта от боруобатын эмиэ ыыппыттар. Олор түмүктэринэн туохтан охтубуттара чуолкайданыаҕа.

Соторутааҕыта эбээхтэр улууска олохтоммут үүт субсидиятын кээмэйигэр сөбүлэспэттэрин биллэрбиттэрэ уонна ону саҥаттан көрөргө көрдөспүттэрэ. Онон улуус баһылыга, депутаттар уонна тыа хаһаайыстыбатын управлениета сүбэлэһэн баран, хаһаайыстыба бары көрүҥэр биир тэҥ сыананы - 22 солк. 50 харчыны - быспыттар. Онон бу боппуруос быһаарылынна диэххэ сөп.