Манна «Коми төрүт олохтоох дьахталлара» регионнааҕы уопсастыбаннай хамсааһын бэрэссэдээтэлэ, экономическай наука доктора, Сыктывкардааҕы государственнай университет «Баан дьыалата» кафедратын профессора Галина Князева, муниципалитеттар икки ардыларынааҕы ассоциация толорооччу дириэктэрэ Дмитрий Горохов,  республика баһылыгын уонна правительство дьаһалтатын олохтоох бэйэни салайыныы боппуруостарыгар департамент салайааччытын э.т. Василий Сапсай, генеральный олохтоох бэйэни салайыныыга быраап өттүнэн көмөлөһөр агентство дириэктэрэ Пётр Бурцев, куорат Думатын бэрэссэдээтэлин сүбэһитэ Руслан Неустроев, Ил Түмэн аппараатын үлэһиттэрэ кытыннылар.

Ил Түмэн олохтоох салайыныыга сис кэмиэтин бэрэссэдээтэлэ  Василий Местников  бу үлэ олус наадалааҕын уонна итини 136-с №-дээх федеральнай сокуоҥҥа сыһыары тутан ырытта.

Татьяна Саладина Комига территориятааҕы бэйэни салайыныы сайдыытын туһунан кэпсээтэ. Ити кэнниттэн кинилэр баар кыһалҕалары тилэри ырыттылар. Ол курдук, кворум, үбүлээһин боппуруостарын өрө туттулар. Комига маннык үбүлээһини сокуонунан быһаарбыттар. Ол быһыытынан ТОС-тар госбюджет нөҥүө граннары ылар эбит. 2013 сылга «ЛУКОЙЛ» ААО олохтообут граннарын 35 ТОС ылбыт.

ТОС-тар хара бастакыттан юридическай сирэй быһыытынан тэриллэллэр. Онуоха АТОС (Ассоциация территориальных общественных самоуправлений) улаханнык көмөлөһөр.

2014 сыл тохсунньу 1 күнүттэн Комига 46 ТОС тэриллибит. Билигин ити 56 диэри тиийбит.

ТОС-тар оҕо оонньуур, спортивнай площадкалары туппут, суолу, суол кытыытынан дьон сылдьар тратуардарын өрөмүөннээбит, дьиэ таһынааҕы сири-уоту, уунан хааччыллыыны тупсарбыт, айылҕа харыстабылыгар ылсан үлэлиир. Ити туһунан Татьяна Саладина кэпсээтэ уонна хаартыскалары көрдөрдө.

Ил Түмэн пресс-сулууспата иһитиннэрбитинэн, бу көрсүһүүгэ уопуту атастаспыттар. ТОС-ка майгынныыр түөлбэлэр республика элбэх улуустарыгар өрө тахсыылаахтык үлэлииллэр.