Нерюнгрига Байкал-Амур магистрала тутуллубут 40 сылыгар анаммыт миитиҥҥэ көлүөнэлэр көрүстүлэр.

«Эһиги 4 тыһыынча км. уһуннаах аан дойдуга ханна да суох тимир суолу туппуккут. Тимир суол 11 бөдөҥ өрүһү, ол иһигэр Братскай куорат анныгар Ангараны, Уус-Кукка Өлүөнэни, Комсомольск-на-Амуре куоракка Амуру кытта быһа охсуһар. БАМ-гар  улахан уонна дьоҕус 2230 муоста, 8 тоннель тутуллубута», - диэтэ эҕэрдэ тылыгар Семен Винокуров.

"Сэбиэскэй сойуус араас муннугуттан кэлбит ыччат сүүрбэ сыл устата бу тутууга күүрүүлээхтик үлэлээбитэ. Манна курдук үлэҕэ дьоруойдуу быһыы аан дойдуга ханна да суох. Дойдуга уҕараабат таптал, бэриниилээх буолуу бу тутуу кэмигэр дьэҥкэтик көстүбүтэ.

Беркакит — Томмот — Дьокуускай тимир суол чэрчитэ АЯМ диэн ааттаммыта. Бу БАМ быстыбат сороҕо.

Беркакит – Томмот – Дьокуускай Өлүөнэ өрүс уҥа биэрэгэр Дьокуускай куорат утары тиксибитэ. Бу тимир суол Хотугулуу Илин уонна Уһук Илин социальнай-экономическай сайдыыларыгар аартыгы аспыта», - диэтэ миниистир.