Аан дойдуну атыйахтыы аймаабыт Аҕа дойду көмүскүүр Улуу сэрии уһук хоту сытар Абый улууһун дьонун-сэргэтин эмиэ тымныы тыынынан хаарыйбыта. Туох-баар үлэ-хамнас барыта фронт туһугар туһаайыллыбыта. Ол курдук, 2 мөлүйүөн 79 тыһыынча солкуобай сууумалаах күндү түүлээх бултаммыта, кыһыл көмүс хостооһуна, советскай саллааттарга анаан ичигэс таҥас хомуйуута, балыктааһын тэриллибитэ, танковай колонна тутуутугар уу харчынан көмө оҥоһуллубута.

Аҕа көлүөнэ дьон, сэрии сылларын оҕолоро оччотооҕу аас-туор олох түгэннэрин, аччыктааһын, тулаайах хаалыы, күндү киһини сүтэрии ыар аһыытын, харах уута халыйыытын эттэригэр-хааннарыгар иҥэринэн улааппыт сэрии сылларын оҕолоро, бу күн үөрүүлэрэ, долгуйуулара муҥура суох.