"Саха сирин брендэ буолуохтаах тосхолу тобулуҥ",  -- диэн эттэ Александр Бречалов мунньаҕы аһар эҕэрдэ этиитигэр. Кини Украинаҕа уонна Москва Болотнай болуоссатыгар буолбут хамсааһыннары холобурдаан туран, итинник быһыыны-майгыны болҕомтото суох хаалбыт социальнай бөлөхтөр үөскэтэллэрин санатта. Ол иһин Общественнай палаата общество бары араҥатыгар аһаҕас буолуохтааҕын бэлиэтээтэ. Олус элбэх "төгүрүк остуоллары" ыытан үлүһүйэр табыллыбытатын, ол оннугар чопчу түмүктээх үгүс үлэни ыыталларыгар сүбэлээтэ. Общественнай палаата бастакы састааба Гражданскай форуму ыытан, өрөспүүбүлүкэҕэ Тыа сирин, Арктика сылларын ыытыы курдук суолталаах тэриһиннэр буола туралларын, бары министерстволарга, үгүс улууска Общественнай сэбиэттэр тэриллибиттэрин сэргээбитин иһитиннэрэн туран, Александр Бречалов: "Саха сиринээҕи Общественнай палаата саҥа састаабын бары көҕүлээһиннэрин өйүөхпүт", -- диэн эттэ. РФ Общественнай палататын сэкирэтээрэ:

-- Эһиги биир соруккутунан Саха сирин брендин оҥорор общественниктары кытта үлэлэһэн, ол тосхолу тобулуҥ, -- диэн сүбэлээтэ.

Солбуйааччылар үһүө буоллулар

Бастакы састаап бэрэссэдээтэлэ киһитэ аҕыйаҕынан икки солбуйааччылааҕа. Саҥа састаап бары общественнай холбуһуктартан уонна улуустар общественнай сэбиэттэриттэн таҥыллан 65 киһилээх. Онуоха Эбээн-Бытантай улууһун общественнига Светлана Горохова: "Арктика, киин, соҕуруу улуустарынан биирдии солбуйааччы баар буоллун", -- диэн этии киллэрдэ. Ол сөп курдук эрээри, бэрэссэдээтэл Вячеслав Алексеев быһаарбытынан, 41 общественнай холбуһуктан 15 бэрэстэбиитэл, Дьокуускай куораттан эмиэ общественник үгүһүн учуоттаан, "хоту-соҕуруу" диэн араарбакка, дьыалабыай хаачыстыбаны учуоттуурга эттэ. Ону ылыннылар. Марина Богословскаяны, Семен Кырбасовы уонна Иван Гороховы, кинилэр бэйэлэрин санааларын истэн баран, солбуйааччыларынан таллылар.

Общественнай палата салайар уорганыгар үс киһилээх сэбиэти талыыга эмиэ кэпсэтии тахса сырытта. Испииһэккэ Нерюнгриттэн Нелля Бигеева, общественнай холбоһуктартан Иван Шамаев, Анна Кузнецова киирбиттэр. Ол эрээри: "Бигееваттан ураты мунньахха суох дьону тоҕо талабыт? -- диэн ыйытыы үөскээбитигэр, куоластааһыҥҥа этии киирдэ. Иван Шамаев общественник быһыытынан киэҥник биллэр буолан, биир -- "утары", түөрт -- "туттунна" диэннээх баһыйар куолаһынан, "сиидэни" ааста. Оттон Анна Кузнецованы ким да билбэт буолан, кини куолас ылбата. "Кими талыахха?" -- диэн ыйытыы турбутугар, "кыахтаах эдэр киһи" диэн суруналыыс Антон Жондоровы таллылар. Бу иннинэ аҕай эдэр киһи тыл көрдөөн трибунаҕа тахсан: "Александр Бречалов мунньахтан тоҕо тахсан барда?" -- диэн хомуруйбута. Антон бу тахсыыта, биллэн турар, болҕомтону бэйэтигэр тарпыта. Саха сиригэр Общественнай палата иккис састааба талыллан үлэтин саҕалаабытынан эҕэрдэлээн, кэс тылын этэн баран, пленарнай мунньах техническэй боппуруостарын быһаарар кэмигэр Александр Бречалов атын суолталаах наадалаах буолан, тахсан барбыта. Ол ону Антон Жондоров ыйытыытыгар быһааран биэрбиттэрэ. Онтон суруналыыс бэйэтин көрдөрөн, үгүс киһи санаатын киниэхэ уурда. Ханнык баҕарар боппуруоска толлон турбакка быһаарсыа диэтэхтэрэ. Бу маннык дьон Общественнай палаата үлэтин хамсаталларыгар эрэл үөскүүр.

Общественноһы кытта ыкса сибээстээх үлэ эрэйиллэр

СӨ Аҕа баһылыгын эбээһинэһин быстах кэмҥэ толорооччу Егор Борисов улуустарга сылдьан, общественноска өрүү улахан болҕомтотун уурар. Ханнык да ыарахан, тыҥааһыннаах быһыыга-майгыга кини: "Общественнай сэбиэттэ тэриниҥ", -- диэн сүбэлиир. Ол курдук, Тиксиигэ, Уус-Ньараҕа, Нериюнгригэ общественнай сэбиэттэр бары боппуруостарга быһаччы кыттыһан, улуустар муниципалитеттарыгар дьоһуннаах өйөбүлү оҥорон эрэллэр. СӨ Общественнай палаататын саҥа састаабын кытта көрсөрүгэр Егор Афанасьевич бастакы састаап үлэтин сыаналаан туран, саҥа талыллыбыт Общественнай палаата өрөспүүбүлүкэ олохтоохторун уонна общественноһын кытта ыкса сибээстээхтик үлэлииллэригэр ыҥырда.