Бэс ыйын 7-11 күннэригэр ыытыллар форумҥа Австралия, Франция, Великобритания, Италия, Чехия, Япония, Корея, Уһук Илиҥҥи уонна Сибиир федеральнай уокуруктарын социальнай сулууспаларын үлэһиттэрэ, РФ Үлэҕэ уонна социальнай сайдыыга министиэристибэтин Уопсастыбаннай Сэбиэтин, РФ Уопсастыбаннай палататын – барыта 400-тэн тахса киһи кэлэрэ былааннаммыта.

Бэс ыйын 8 күнүгэр П.Ойуунускай аатынан Саха академическай театрыгар научнай-практическай конференция уонна Социальнай үлэһит күнүгэр аналлаах семинар үлэтин саҕалаата. Сүрүн дакылааты СӨ Бырабыыталыстыбатын Бэрэссэдээтэлин солбуйааччы Алексей Дьячковскай оҥордо. Кини бу форум социальнай эйгэҕэ үлэ эппиэтинэһин уонна көдьүүһүн үрдэтэргэ, омук сирдэрин үөрүйэхтэрин ылынарга анаан тэриллэрин, онон форумҥа сылдьыбыт хас биирдии киһи туох эрэ саҥаны билэн-көрөн барыахтааҕын бэлиэтээтэ.

СӨ Судаарыстыбаннай Мунньаҕын бэрэссэдээтэлин солбуйааччы Ольга Балабкина иһитиннэрбитинэн, Саха Өрөспүүбүлүкэтин салалтата социальнай эйгэ боппуруостарын куруук болҕомтоҕо ыларын туһунан кэпсээтэ. РФ Үлэҕэ министиэристибэтин Уопсастыбаннай сэбиэтин чилиэнэ Антонина Дашкина маннык форумнар Алтайга, Тываҕа, Новосибирскайга буолбуттарын туһунан кэпсээтэ. Манна даҕатан эттэххэ, Евразийскай форум биир сылга Россияҕа, иккис сылыгар Кореяҕа ыытыллар үгэстээх. Корея Өрөспүүбүлүкэтин социальнай үлэһиттэрин ассоциациятын бастакы вице-президенэ Хан Ху-Бин социальнай үлэһит оруола үрдүүрүгэр баҕа санаатын эттэ. Кореяҕа социальнай үлэһиттэри тиһигин быспакка үөрэтэллэр. Тоҕо диэтэххэ, социальнай эйгэ тутулуттан дойду олоҕо тутулуктаах.

Киэһэ Саха академическай театрыгар Евразийскай форум үлэтин түмүгэ таһаарылынна. Ол кэнниттэн Социальнай үлэһит күнүгэр аналлаах улахан концерт буолла.

Бэс ыйын 9 күнүгэр Өлүөнэ очуостарыгар теплоходунан устуу кэмигэр ыытыллар семинар чэрчитинэн социальнай үлэһиттэргэ маастар-кылаастар буолуохтара.

Бэс ыйын 10 күнүгэр форум кыттыылаахтара өрөспүүбүлүкэ социальнай тэрилтэлэригэр: инбэлииттэри биир кэлим реабилитациялааһын өрөспүүбүлүкэтээҕи социальнай-чэбдигирдэр киинигэр, кырдьаҕастар уонна инбэлииттэр интернат-дьиэлэригэр, нэһилиэнньэни социальнай хааччыйыы өрөспүүбүлүкэтээҕи киинигэр, сокуоннай саастарын ситэ илик оҕолор социальнай-реабилитационнай кииннэригэр, Дьокуускайдааҕы психоневрологическай интернакка уо.д.а. социальнай объектарга сылдьыахтара.

Киэҥ хабааннаах форум Социальнай үлэһит күнүгэр ананна. Россияҕа социальнай сулууспалары сайыннарыыга, ол иһигэр Уһук Хотугу сиргэ, Арктика оройуоннарыгар, Россия Азия-Тихэй океан регионугар, болҕомто уурулунна. Онуоха дойду араас регионнарыттан уонна омук сириттэн кэлбит ыалдьыттар үлэ үөрүйэҕин үллэһиннилэр. Аан дойдутааҕы сибээһи сайыннарыыга уопсастыбаннай дипломатия уонна бырабыыталыстыбаннайа суох тэрилтэлэр оруолларын дьүүллэһиэхтэрэ.

Евразийскай форум чэрчитинэн семинардар, социальнай өҥөлөрү кэпсиир быыстапкалар буолаллар. Семинардарга социальнай хааччыйыы сытыы боппуруостара таарыллаллар, «Социальнай эйгэҕэ чааһынай-судаарыстыбаннай бииргэ үлэлээһин - кырдьаҕастарга уонна инбэлииттэргэ социальнай өҥөнү оҥоруу хаачыстыбатын үрдэтии суола» уонна «Социальнай үлэ – наука, практика, олох» «төгүрүк остуоллар» ыытыллаллар.

Форуму «Социальнай педагогтар уонна социальнай үлэһиттэр союзтара» Бүтүн Россиятааҕы уопсастыбаннай тэрилтэ, бу тэрилтэ Саха сиринээҕи отделениета, СӨ сэрии, үлэ бэтэрээннэрин, Сэбилэниилээх күүстэр уонна быраабы араҥаччылыыр уорганнар уопсастыбаннай тэрилтэлэрэ, «Кыайыы» судаарыстыбаннай тэрилтэ, СӨ Ил Дарханын уонна Бырабыыталыстыбатын, Европа Сэбиэтин, РФ Үлэҕэ уонна социальнай сайдыыга министиэристибэтэ, РФ-га Францията посольствата өйөөтүлэр.