Саҥа элбэх өҥөнү оҥорор Суслова 8, 1-кы корпуһугар турар кыһыннары үлэлиир Автосервис мастарыскыайга массыына ходовой чааһын өрөмүөннээн, алдьаныытын быһааран, арыытын уларытан, көлүөһэни таҥан-оҥорон биэриэхтэрэ.

Сырдык, киэҥ-куоҥ мастарыскыайы аһыы үөрүүлээх малааһыныгар кэлбит ыалдьыттар, урбаанньыт уолаттар, чугас аймахтара бэйэлэрин истиҥ эҕэрдэлэрин эттилэр, сэмэй бэлэхтэрин туттардылар. Ол курдук оройуоммутугар билиҥҥи кэмҥэ туһалаах аныгы өҥө аһыллыбытынан улуус дьаһалтатын баһылыгын бастакы солбуйааччы Спартак Илларионов, социальнай боппуруостарга баһылыгы солбуйааччы Людмила Александрова, улуустааҕы урбаанньыттары өйүүр фонда начальнига Аида Гоголева, нэһилиэк баһылыгын солбуйааччы Саргылана Алексеева, Степан бастакы учуутала Альбина Борисова, нефтебаза начальнига Александр Никифоров эҕэрдэ тыллары эттилэр. Дьоро күн "буруйдааҕа" Степан Степанович мастарыскыайыгар баар аппараттарын туһунан көрдөрө-көрдөрө кэпсээтэ.

- Бу олунньу ыйтан чааһынай урбаанньыт буолбутум, улуустааҕы предпринимателлэри өйүүр фондаттан улахан сууммалаах кредит ылан үлэбин саҕалаан барбытым. Улахан массыынаны эрэ ыйаан таһаарар 4 тонналаах оборудованиены, анал аппарааттары, станогы Иркутскайтан аҕалбытым. Ленскэйтэн тутуу материалларын аҕалан тутан барбыппыт. Бу иһигэр 4 массыына батар гараж буолуохтаах. Билиҥҥи кэминэн иккиэ буолан механигым Иван Сидоровтыын үлэлиэхпит. Көмөлөспүт, өйөөбүт оройуон баһылыгар А.С.Ивановка, нэһилиэк баһылыгар В.Н. Романовка, урбаанньыттар фондаларыгар А.Н. Гоголеваҕа, В.С Ивановка, Ростелеком уолаттарыгар,  Михаил Никифоровка, Александр Никифоровка, Виктор Семеновка, тапталлаах ийэбэр Светлана Егоровнаҕа уонна көмөлөспүт бары табаарыстарбар истиҥ махталбын тиэрдэбин.

Бу курдук урбаанньыттар сылларыгар бэйэбит олохтоох уолаттарбыт сайдыы суолун тутуһан, ыарахаттар да ниннибэккэ саҥа өҥөнү арыйан нэһилиэнньэ туһатыгар үлэлии-хамсыы сырыттыннар.