Бырайыак ыччаттар улууспут сайдыытыгар бэйэлэрин кылааттарын киллэрсэллэригэр, нэһилиэктэр тас көстүүлэрин тупсарыыга үлэлэһэргэ, улуус аҕам саастаах олохтоохторугар көмөлөһөргө, иитэр-үөрэтэр итиэннэ ыччат ортотугар чөл олоҕу көҕүлүүргэ аналлаах. Этэрээт састаабыгар транспортнай техникумтан итиэннэ Төҥүлүтээҕи профессиональнай лицейтэн 15-тии устудьуон киирэр. Улуус ыччатыгар холобур буолар уолаттар анал формалаахтар, үлэлииргэ-хамсыырга, көмө оҥорорго куруутун бэлэмнэр.

Ороссолуодаҕа транспортнай техникум байыастарын оскуола коллектива көрүстэ. Уолаттар улууска үөрэҕирии ситимэ тэриллибит историятын кэпсиир музейга сырыттылар, бэйэлэрин идэлэрин туһунан оскуола үрдүкү кылааһын үөрэнээччилэригэр ирэ-хоро кэпсээтилэр, үлэ, тыыл ветеранын, 10 оҕолоох герой-ийэни, улуус, Ороссолуода нэһилиэгин бочуоттаах гражданинын Анна Павловна Степанованы кытта көрүстүлэр,үлэ ветераныгар Анисия Петровна Сергееваҕа оттор маһын хайытан биэрдилэр, үлэҕэ киллэриллээри турар саҥа детсад таһынааҕы үлэтигэр, хаар ыраастааһыныгар, мебель таһыытыгар илии-атах буоллулар, Ороссолуода ыччатын кытта көрүстүлэр. Көрсүһүүгэ улуус ыччатын управлениетын сүрүннүүр специалиһа Зоя Сергучева ыччат политикатыгар республикаҕа, улууска туох-ханнык тэрээһиннэр хамсааһыннар бара туралларын сырдатта. Киэһэ эдэр дьон спортивнай күрэхтэһиилэри тэрийэн, олохтоохтору сэргэхситтилэр.

«Эдэр гвардия» общественнай түмсүү чилиэнэ, баһылык этэрээтин салайсар Айаан Верховцев СИА корреспонденыгар ыам ыйыгар диэри аҕыс нэһилиэккэ сылдьыахтаахтарын эттэ. «Сотору Дьаҥхаады нэһилиэгэр эмиэ маннык хабааннаах тэрээһини ыытыахпыт. Билигин «Эдэр гвардия» нөҥүө өссө биир ‒ «Оҕо оонньуур площадката» диэн бырайыагы былаанныы сылдьабыт, халлаан сылыйдаҕына бырайыакпытыгар үлэлэһиэхпит. Биһиги нэһилиэк баһылыктарыттан бииргэ үлэлииргэ этиилэри күүтэбит», - диэтэ кини.

Эдэр эрчимнээх байыастар: «Мас хайытарбытын, сибиэһэй салгыҥҥа үлэлиирбитин ахтыбыт эбиппит», ‒ диэн үөрэ-көтө этэллэр.