Улуус кылаабынай бырааһа Алексей Павлов дакылаатыгар үлэни-хамнаһы сиһилии билиһиннэрдэ итиэннэ сайдыы хайысхаларын торумнаата. Ааспыт сыл түмүгүнэн улууспутугар оҕо төрөөһүнэ 9 бырыһыанынан элбээбитин, киһи өлүүтэ аччаабытын ыйда. Нэһилиэнньэни көрөр-истэр быраастар үлэ былаанын толорботторуттан хамнас боппуруоһугар өйдөспөт буолуу тахсарын, инникитин ыарыһаҕы кытта сыһыаны тупсарарга, болҕомтону туһаайан үлэлииргэ, төһө ыарыһаҕы көрбүттэн хамнас тутулуктанарын аһаҕастык эттэ. Эбии диспансеризация 95,7 бырыһыан толоруллубут. Нэһилиэнньэ 64 бырыһыана эмп үлэһиттэрин үлэтин сөптөөҕүнэн аахпыта бэлиэтэннэ. Инникитин сүрэх-тымыр, онкология ыарыыларыттан, сэлликтэн өлүүнү итиэннэ оҕо өлүүтүн аччатар дьаһаллары ылынарга үлэни-хамнаһы ыытарга эттэ. Отчуокка ФЛГ чинчийиини нэһилиэнньэ 10-ча бырыһыана ааспатаҕа ахтылынна. Быйыл 22 294 киһи хайаан да ФЛГ чинчийиинэн хабыллыахтааҕа ыйылынна.

Салгыы улууска сэллиги утары охсуһуу туһунан диспансер кылаабынай бырааһа Екатерина Борисова, киин балыыһа экономиһа Сардаана Баягантаева, эминэн хааччыйыы туһунан Наталья Федорова, материальнай-техническэй базаны сайыннарыы туһунан Сергей Черкашин, о.д.а. иһитиннэриилэри оҥордулар.

Ааспыт сыл түмүгүнэн быраас орто хамнаһа 67 346,34, орто медперсонал ‒ 37 453,04, алын медперсонал ‒ 23 516,18 солкуобайга тэҥнэспит. Улуус үрдүнэн 113 быраас, 311 орто медперсонал үлэлииллэр.

Көрсүһүү түмүгэр үлэ-хамнас бастыҥнарыгар наҕараадалар туттарылыннылар. Ааспыт сыл түмүгүнэн бастыҥ көрдөрүүлэнэн Хаптаҕайдааҕы балыыһа (салайааччы Евгения Захарова), Өлөчөйдөөҕү фельдшерскэй-акушерскай пуун (биэлсэр Ульяна Билюкина), улуустааҕы сэллиги утары охсуһар диспансер (салайааччы Екатерина Борисова), улуустааҕы киин балыыһа отделениеларыттан реанимация отделениета (салайааччы Гаврил Жирков), рентгенологическай отделение (салайааччы Семен Попов) коллективтара кыайыылаахтарынан ааттаннылар.