Иннокентий Сосин мөссүөнэ ойууламмыт мемориальнай дуоската аһыллыытын үөрүүлээх түгэнигэр элбэх киһи ыалдьыттаата. Мемориальнай дуосканы оройуон Сэбиэтин бэрэссэдээтэлэ Андрей Находкин, культура уонна духуобунай сайдыы управлениетын начальнига Сергей Холмогоров, оройуоннааҕы киин библиотека директора Елизавета Корнилова, Россия Суруйааччыларын союһун чилиэнэ Константин Сосин, төрөппүт кыргыттара: Амматааҕы лицей директора, СР үөрэҕириигэ үтүөлээх үлэһитэ, педагогическай наука кандидата Дария Захарова, М.К.Аммосов аатынан ХИФУ научнай библиотекатын секторын сэбиэдиссэйэ Октябрина Сосина үөрүүлээх быһыыга-майгыга астылар, сибэкки дьөрбөтүн уурдулар.

Иннокентий Михайлович кыргыттара: «Аҕабыт сырдык аатын үйэтитиигэ улахан үлэ барбытыгар махтанабыт», ‒ диэн үөрүүлэрин үллэһиннилэр.

Ол кэннэ библиотека ааҕар саалатыгар толору мустубут ыалдьыттар сүһүөхтэригэр туран үөрүүлээх чааһы Иннокентий Сосин суруйбут «Мэҥэлэр Өрөгөй ырыаларынан» саҕалаатылар.

Баай историялаах, кырдьаҕас библиотека 80 сылынан эҕэрдэлии республика араас муннуктарыттан, Дьокуускай куораттан ыалдьыттар кэлбиттэр. Эҕэрдэ тыл үтүөтүн, маанытын библиотекаҕа өр сылларга үлэлээн-хамсаан ааспыт ветераннарга, үлэһиттэргэ Национальнай библиотека методиһа Сардаана Евдокимова, кырдьаҕастар «Ытык сүбэ» түмсүүлэрин бэрэссэдээтэлэ Василий Эверстов, М.К.Аммосов аатынан ХИФУ медицинскэй институтун доцена, медицинскэй наука кандидата, мелодист Виталий Андросов, СР культуратын үтүөлээх үлэһитэ, библиотекаҕа сэбиэдиссэйинэн үлэлээбит Варвара Шеломова, үөрэх управлениетын методиһа Людмила Дьячковская уо.д.а анаатылар.

Культура уонна духуобунай сайдыы управлениетын аатыттан 10 000-лаах сертификат туттарылынна итиэннэ управление салайааччыта Сергей Холмогоров быйылгы сыл культура эйгэтигэр библиотека сыла биллэриллибитинэн, библиотека материальнай-техническэй базатын бөҕөргөтүүгэ күүскэ үлэлэһиэхпит диэтэ. Оройуон дьаһалтатын, депутаттар Сэбиэттэрин, культура уонна духуобунай сайдыы управлениетын аатыттан кэккэ үлэһиттэргэ бочуотунай грамоталар туттарылыннылар.

Бу күн библиотека үлэһиттэрэ Марианна Никанорова уонна Анна Петрова «Айылҕаҕа абылаппыт суруйааччы» диэн Иннокентий Сосин айар үлэтин кэпсиир саҥа мультимедийнэй дискэни сүрэхтээтилэр. Түөрт түһүмэхтэн турар ис хоһоонноох дискэ аныгы ирдэбилгэ толору эппиэттиир, манна суруйааччы кинигэлэрэ электроннай көрүҥүнэн, хаартыскалар, видеолар, суруйааччы хоһооннорунан суруллубут ырыалар киллэриллибиттэрин кэлбит дьон сэргээтилэр. Иннокентий Сосин аатын үйэтитиигэ инникитин элбэх былааннар баалларын эттилэр.

Күн иккис аҥарыгар библиотека эдэр үлэһиттэрэ маастар кылаастары ыыттылар, ону тэҥэ оҕо библиотекатын фойетыгар «Иэйии биһигэ» диэн литературнай музыкальнай саала аһыллыыта буолла. Саҥа саалаҕа ыытыллар бастакы үөрүүлээх тэрээһин Иннокентий Сосиҥҥа ананна. Библиотека үлэһиттэрин толоруутугар суруйааччы дойдуга тапталы хоһуйбут хоһоонноро, сураҕырбыт «Биригэдьиир Марыыната» ылланна, «Мүрү, Мүрү барахсан» ырыата Руслан Габышев толоруутугар кырыымпаҕа доҕуһуолланна. Бастакы хоһооно тахсарыгар Иннокентий Михайлович улахан өҥөтүн туһунан быраата Константин Сосин кэпсээтэ, Иннокентий Сосин көнө, холку майгытын, сээркээн сэһэнньитин туһунан суруйааччы, суруналыыс Степан Марков, «Таммахтар» литературнай холбоһук салайааччыта Августина Хабарова, мелодист Виталий Андросов ахтыы оҥордулар. Биллиилээх спортсмен Афанасий Илларионов суруйааччы кэргэнигэр Евдокияҕа анаабыт хоһоонугар ырыа матыыба айан ыллаан иһитиннэрбитэ кэрэхсэннэ.