‒ Эһигини барыгытын Мэҥэ-Хаҥалас улууһун биир дьоһун, ытык-мааны киһитэ, саха саарына, спортсмен, учуутал, талааннаах тэрийээччи Иннокентий Тихонович Васильев сырдык аатын үйэтитэр ураты түгэн үүммүтүнэн итиитик-истиҥник эҕэрдэлиибит. И.Т.Васильев аатын Мэҥэ-Хаҥалас спортивнай албан аат музейыгар иҥэрии түбэспиччэ буолбатах. Кини хайыһар, велоспорт, дуобакка суруйсан күрэхтэһиилэригэр, ГТО многоборьетыгар республика чемпиона, хаартыскаҕа түһэриигэ Союз, Россия дипломана, лауреата, дуобакка республикатааҕы категориялаах судьуйа, РСФСР норуот үөрэҕириитигэр туйгуна, СР культуратын үтүөлээх үлэһитэ, улуус Бочуоттаах гражданина , 1971 с. Дьабыылга Саха сиригэр бастакынан спортивнай музейы тэрийбитэ. «Дойду дьонунан аатырар-сураҕырар, дьон дойдутунан аатырар-сураҕырар!» диэн бэргэн этиини тумус туттан Мэҥэ-Хаҥалас ытык сиригэр-уотугар дьоһун дьоннор олорон, үлэлээннэр-хамсааннар, суол-иис хааллараннар улууспут аатын аатырдыбыттара, ‒ диэн өрө көтөҕүллүүлээх тылларынан улуустааҕы культура управлениетын специалиһа Андрей Скрябин үөрүүлээх түгэни аһыллыбытынан биллэрэр итиэннэ өрөгөйдөөх музыкаҕа доҕуһуоллатан И.Т.Васильев аатынан спортивнай албан аат музейын мемориальнай дуоскатын аһыы итиэннэ киирии лиэнтэтин быһа кырыйыыларыгар Иван Птицыны, Александр Брызгаловы уонна И.Т.Васильев огдооботун Мария Охлопкованы ыҥырар.

Үөрүүлээх түгэнинэн эҕэрдэ эриэккэһин, ахтыы истиҥин-иһирэҕин эттилэр: оройуон баһылыгын социальнай боппуруостарга солбуйааччы Иван Птицын, Россия музейдарын союһун президиумун чилиэнэ, Тараҕай нэһилиэгин, улуус бочуоттаах гражданина Егор Шишигин, педагогическай наука доктора, профессор, РФ, СР физическэй культураҕа уонна спорка үтүөлээх үлэһитэ Валерий Кочнев, Саха Комсомуолун бириэмийэтин лауреата, СР культуратын үтүөлээх үлэһитэ, СР народнай артыыһа, улуус бочуоттаах гражданина Аркадий Алексеев, улуус физкультураҕа уонна спорка управлениетын салайааччыта Александр Брызгалов, улуус үөрэҕириигэ управлениетын профсоюһун бэрэссэдээтэлэ Степан Андреев, педагогическай үлэ ветерана Мария Охлопкова.

Эҕэрдэлээбиттэр музей директора Анна Ивановаҕа аадырыс суруктары, телевизор, онтон да атын өйдөбүнньүк бэлэхтэри туттартаатылар.

Салгыы Р.Г.Васильев аатынан кыраайы үөрэтэр музейга бу дьыл тохсунньу 25 күнүгэр төрөөбүтэ 85 сыла туолбут спортсмен, учуутал, фотограф, уруһуйдьут, хомоҕой хоһоонньут, мындыр уус, байанайдаах булчут Иннокентий Тихонович Васильев туһунан үтүөкэннээх ахтыыны оҥорон «төгүрүк остуолга» кэпсэтиини СР физическэй культураҕа үтүөлээх үлэһитэ, бэйэтин кэмигэр хайыһардьыт, сүүрүк быһыытынан сураҕырбыт Афанасий Илларионов саҕалыыр. Ол кэнниттэн И.Васильевы кытта спорт эйгэтигэр чугастык алтыспыт республикатааҕы «Урожай» ДСО бэрэссэдээтэлинэн айымньылаахтык үлэлээбит Афанасий Алексеев, Нуораҕана орто оскуолатын директора Любовь Кычкина, биир кэмҥэ оройуоҥҥа райсовет исполкомун спорка комитетын салайбыт, милиция подполковнига Дмитрий Яковлев, биллиилээх спортсмен Аркадий Алексеев уо.д.а. чөл олоҕу тутуһууну, чэгиэн, доруобай буолууну бу Иннокентий Тихонович курдук дьон-сэргэ ортотугар дьаныардаахтык ыытарга сүбэлээн-амалаан тыл этэн амалыйдылар, сүбэ-соргу биэрдилэр. Бу дьоро күнү И.Т.Васильев сиэнэ Эллэй Васильев уонна оскуола үөрэнээччилэрэ ырыа-хоһоон этэн-тыынан бэркэ диэн киэргэттилэр, астыннардылар.

Ити күн нуучча дуобатыгар, сыал ытыытыгар, онтон сарсыныгар Нуораҕанаҕа, И.Т.Васильев 10 сыл учууталлаабыт оскуолатыгар ветераннарга анаан нуучча дуобатыгар күрэхтэһиилэр үрдүк таһымнаахтык ыытылыннылар.

И.Т.Васильев Дьабыыл орто оскуолатыгар 1971с. ахсынньы 12 күнүгэр Спортивнай Албан аат музейын оскуола биир кылааһыгар аһарыгар сылдьан турардаахпын. Баатараттан төрүттээх биир дойдулааҕым оччотооҕуга Дьабыыл нэһилиэгин сельсоветын бэрэссэдээтэлинэн үлэлээбит Иннокентий Сергучев бу музейы тэрийиигэ Иннокетний Тихоновичтыын биир сүбэнэн, биир толкуйунан чөл олоҕу туругурдууга бииргэ үлэлээбиттэрин бар-дьон бэркэ диэн билэллэр буолуохтаах. Нэһилиэктэрбит баһылыктара бу икки саха саарыннарын үтүөкэннээх дьулуурдарын өссө уот кыымнаан биэрэллэрэ буоллар диэн түмүккэ кэлэҕин И.Т.Васильев аатынан спортивнай музей үөрүүлээх тэрээһинигэр сылдьан баран…