Иннокентий Михайлович олохтон барыар диэри бу дьиэҕэ олорон айбыта-туппута, кинигэлэрин бэлэмнээбитэ. Үөрүүлээх түгэҥҥэ кыттыыны ылбыт "Чолбон" сурунаал кылаабынай редактора Николай Винокуров–Урсун суруйааччыны үйэтитиигэ болҕомтолорун уурбут улуус салалтатыгар, улуустааҕы культура управлениетыгар суруйааччылар ааттарыттан махтанна. Эҕэрдэ тылы оройуон баһылыгын социальнай боппуруостарга солбуйааччы Иван Птицын, улуус культураҕа уонна духуобунай сайдыыга управлениетын начальнига Сергей Холмогоров, суруйааччы кыыһа Дария Захарова эттилэр.

Салгыы Р.Г.Васильев аатынан улуустааҕы кыраайы үөрэтэр музейга Иннокентий Михайлович биир дойдулаахтара, үөлээннээхтэрэ, кинини кытта өр сылларга алтыспыт бар дьоно ахтыы күнүгэр түмүстүлэр. Ф.Г.Охлопков аатынан Майа орто оскуолатын 4 "а", "б" кылааһын үөрэнээччилэрэ суруйааччы хоһооннорун аахтылар, Кеша Неустроев "Куобахтар үөкүүлэрэ" диэн монологунан кытынна.

Суруйааччылар союзтарыттан саха народнай суруйааччыта Семен Попов–Тумат, "Чолбон" сурунаал кылаабынай редактора Николай Винокуров–Урсун, Иван Осипов–Ойуур, Константин Сосин, Степан Марков, Иннокентий Михайлович кыргыттара, сиэннэрэ, оройуон салалтатыттан, культура эйгэтин үлэһиттэрэ, суруналыыстар итиэннэ алтыспыт дьоно истиҥ-иһирэх ахтыылары оҥордулар. Амма улууһуттан элбэх киһилээх делегация кыттыыны ылан тэрээһини өссө кэҥэттэ.

Суруйааччы хоһоонноругар ырыалары "Хотугу сулуһу" Иннокентий Цыпандин, "Ийэм ырыатын" Иван Аргунов, "Махтана саныыбын" Дмитрий Егоров, "Татыйаас барахсаны" Михаил Санников, "Биригэдьиир Марыынаны" Иван Корякин–Бөтүүнүскэй ыллаатылар.

Иннокентий Сосин аатын-суолун, үлэтин-хамнаһын үйэтитиигэ 2018 сылга диэри анал былаан оҥоһулунна. Улуустааҕы киин библиотекаҕа суруйааччы аата иҥэриллэрэ, ахтыы кинигэ тахсара, ааҕааччылар конференциялара онтон да атын тэрээһиннэр ыытыллаллара былааннанар.