Атырдьах ыйын 2 күнүгэр РФ ИДьМ Өлүөхүмэтээҕи тэрилтэтин дьуһуурунай чааһыгар оҕо сүппүтүн туһунан иһитиннэрии киирбитэ. 4 саастаах кыыс оҕо от ыйын 29 күнүгэр дьиэтиттэн барбыт. Ийэтэ оҕону ыаллыы баар нэһилиэккэ олорор аҕата ылбыт дии саныы сылдьыбыт. Ол эрээри, оҕо аҕата баһаары умуруорууга үлэлии сылдьар буолан, оҕону ылбатаҕын туһунан эппит.

Субу соторутааҥҥыта WhatsApp месенжерынан оҕо өлүгэ көстүбүтүн туһунан сурах өрөспүүбүлүкэни тилийэ көттө.

Бу туһунан ЫБММ кылаабынай управлениетыттан ыйыталастыбыт.  «Биһиэхэ билиҥҥитэ итинник иһитиннэрии киирэ илик. Кэлиҥҥи кэмҥэ WhatsApp араас сымыйа сураҕы тарҕатар буолбутун үгүспүт билэр», - диэн СИА-ҕа управлениеттан эттилэр.