Орто Халыма улууһун Иккис Мээтис нэһилиэгэ, атырдьах ыйын 18 күнүнээҕи туругунан, 720 тонна от былааннааҕын 7 тоннанан аһары куоһарда. Онон бу нэһилиэк СР тыатын хаһаайыстыбатын уонна ас-үөл политикатыгар Министиэристибэтин сүөһү аһылыгын бэлэмнээһиҥҥэ республикатааҕы куоталаһыыга кытынна.

Ол кэнниттэн, атырдьах ыйын 25 күнүнээҕи туругунан, Иккис Хаҥалас нэһилиэгэ былаанын толордо. Кини 720 тонна былааннааҕын 733 тоннаны оттоон 105%-ҥа тириэртэ. Сиэн Күөлэ — 87%, Алаһыай уонна куорат — 80%, Бастакы Хаҥалас — 77%, Бастакы Мээтис — 73%, Хатыҥнаах — 70%, Байды 67% оттоотулар. Онон улууска былаан 82% буолан турар. Бааһынай хаһаайыстыбалар былааннарыттан 91% толордулар.

Тыа хаһаайыстыбатын уонна ас-үөл политикатын Министиэристибэтин иһитиннэриитинэн, былырыыҥҥыны кытта тэҥнээтэххэ, республикаҕа оттооһун көрдөрүүтэ лаппа үчүгэй. Атырдьах ыйын 21 күнүнэҕи туругунан, хотугу улуустарга ордук Абый улууһа инники күөҥҥэ таҕыста. Кини 2 тыһ. 822 тонна оту оттоон, былаанын 104,5% толордо. Салгыы Томпо улууһа үчүгэй көрдөрүүлээх: 5 тыһыынча 964 тонна (88,9%) оту чөкөттө.

Бу күннэргэ улуус баһылыга Евгений Слепцов, улуустааҕы тыа хаһаайыстыбатын управлениетын специалиһа Мария Шарина, Байды нэһилиэгин баһылыга Василий Оконешников, биригэдьиирдэр Илья Кутуков уонна Максим Меняков Мэхээйиллэҕэ резервэ отун туттулар. Санатан эттэххэ, от манна пресстиир массыынанан бэлэмнэннэ. Ол курдук, Мария Александровна кэпсииринэн, Татыйаас сиригэр 3279 устуука, Саһыарбыкка — 1626, Улахан Түөлбэҕэ — 3834, Тумуһахха 1310 устуука от пресстэммит. Онон уопсайа 10 тыһ. 49 устуука от тахсыбыт.

Хамыыһыйа 4 араас оту ыйаан көрбүтүнэн, ортотунан 17 киилэ 325 грамм тахсыбыт. Отчуттар этэллэринэн, бастаан оҥорбут отторо ыйааһынынан улахан эбит, онтон кэлин 16 киилэҕэ тэҥнэһэр гына бэлэмнии сатаабыттар. Маны таһынан, кинилэр массыына көмөтүнэн үлэ чэпчээбитин, элбэх киһи наадата суоҕун бэлиэтээтилэр.

Евгений Михайлович оту хаар-самыыр буортулаабатын инниттэн чарапчы (навес) оҥоһуллуон наадатын ыйда. Оттон билигин көннөрү төһө кыалларынан ардахтан бүөлүүр матырыйаалынан бүрүйдүлэр.

Нэһилиэк баһылыга үлэ түмүгүн үчүгэйинэн сыаналаата. Инникитин атын нэһилиэктэр эмиэ маннык пресстиир массыынанан хааччыллалларын туһугар үлэлэһиэхпит диэтэ.