Граннар

Саха сирин агропромышленнай комплексын департаменын салайааччыта Ульяна Антонова эппитинэн, үлэлэрин саҥа саҕалыыр фермердэргэ, тыа сиригэр предпринимательствонан дьарыктанааччыларга, дьиэ кэргэнинэн сүөһүнү иитээччилэргэ 2012 сылтан бэттэх государство өйбүлэ баар.

Үс сыл устатыгар бу хайысханан киирэр сайаапка ахсаана эбиллэ турар. Дьон маннык хаһаайыстыбаны тэрийэргэ интэриэстэннэ. Департамент даннайдарыгар көстөрүнэн, 2012 сылга көмөҕө наадыйааччы 89 сайаапката киирбит эбит буоллаҕына, 2013 сылга итинник сайаапка ахсаана 121 тиийдэ. 50 фермер граннары ылла. Быйыл 166 сайаапка киирбититтэн, 65 фермер граҥҥа тиксибит.

«Саҥа саҕалааччылары уонна сүөһүнү иитэр фермалары өйүүр сорук турар», - диэн суруналыыстарга эттэ У.Антонова.

Дьиэ кэргэнинэн сүөһүнү иитэр фермаларга 2012 сыллаахха граны 14 дьиэ кэргэн ылбыт эбит буоллаҕына, быйыл — 23. Ити көмө кээмэйэ 200 тыһ.солкуобайтан 1,2 мөл.солк. диэри халбаҥныыр.

Оҕуруот аһын уурар, хаһаанар сир

Егор Борисов тыа сирин сайыннарыыга анаммыт уурааҕар олоҕуран, өрөспүүбүлүкэҕэ оҥоһуллубут аһы-үөлү астыыр уонна харайар, хаһаанар эбийиэктэри тутуохтара.

2020 сылга диэри сылга 2000 тонна оҕуруот аһын, хортуоппуйу оҥорон таһаарар хаһаайыстыбаларга, хоту уонна Арктика улуустарыгар 500 тоннаны таһаарар тэрилтэлэргэ уурар, хаһаанар эбийиэктэри тутуохтара. Киин улуустарга 1000 тоннаны батарар 10 эбийиэги, оттон хоту улуустарга — 500 тоннаҕа анаммыт 13 тутуу баар буолуоҕа.

Сүөһүнү иитии

Ульяна Антонова эппитинэн, саамай элбэх сүөһүлээх муниципалитеттарга механизированнай буойуна тутуллуоҕа. Идэһэ буолар сүөһүнү ыраах сирдэгэ илдьэн мэччитиэхтэрэ, уотуохтара.

42 буойуна тутуллара былааннанар. 2016 сылга үүтү астыыр тэрилтэлэргэ аныгы микробиологическай уонна физико-химическэй лабораториялары үлэлэтиэхтэрэ.