Платон Ойуунускай Саха сирин государственнай тутулун оҥорооччулартан, экономикатын сайдыытын, промышленноһын тэрийитин олус уурсубуттартан биирдэстэрэ этэ. Кини «Саха АССР үлэһиттэрин бырааптарын уонна эбээһинэстэрин Декларациятын» уонна «Саха республикатын автономиятын Балаһыанньатын» тус бэйэтэ бэлэмнээбитэ. Ити докумуоннарга олоҕуран 1922 сыл муус устар 27 күнүгэр Саха автономнай республиката тэриллибитэ, бастакы правительство – Ойуунускай баһылыктаах Народнай Комиссардар Сэбиэттэрэ тэриллибитэ. 1923 сыллаахха Сэбиэттэр I Бүтүн Саха сиринээҕи тэрийэр съезтэригэр республика былааһын үрдүкү органа – Киин толорор кэмитиэт (ЯЦИК) тэриллибитэ, ол бастакы бэрэссэдээтэлинэн Ойуунускай талыллыбыта.

Платон Алексеевич государство эйгэтигэр үлэтэ, кини тулхадыйбат сындааһынын уонна дьулуурун билиҥҥи политиктар сөҕөллөр уонна дириҥник ытыктыыллар. Ойуунускайталааннаах тэрийээччи, салайааччы этэ, кини баар балаһыанньаны барытын миэстэтигэр билэрэ, суһаллык дьоһуннаах быһаарыныы ылынара, нэһилиэнньэ ытыктыбылын ылара, улахан авторитетынан туһанара. Кини государственнай политика сүрүн хайысхаларын, салайыы саҥа культуратын үрдүк таһымнаах толорор диссипилиинэлээх төрүөтүн уурбута. Кини сүрүн үтүөтэ – Саха сирин экономическэй, социальнай, культурнай олоҕор кэккэ уларыйыыларын оҥорбута.

Платон Ойуунускай талаана ураты дэгиттэр. Кини бэйэтин норуотун историятыгар политик эрэ быһыытынан буолбакка, поэт, прозаик, учуонай быһыытынан суолу хаалларбыта. Кини чаҕылхай, элбэх өрүттээх үлэтэ көлүөнэттэн-көлүөнэҕэ куруук хаалыаҕа. Кини төрөөбүт хотугу дойдутун инникитин туһунан ыра санаалара үгүстэрэ олоххо киирэн эрэллэр.

Күндү Саха сирин олохтоохторо! Эһиэхэ кытаанах доруобуйаны, дьолу, этэҥҥэ буолууну, үлэҕэ саҥа ситиһиилэри.баҕарабын! Платон Алексеевич Ойуунускай олоҕо, үлэтэ эһиги үлэҕитигэр, общественнай дьайыыларгытыгар чаҕылхай холобур буоллун!

Саха Республикатын Президенэ Е. БОРИСОВ