"Регион кыстык суолу бэлэмнээһиҥҥэ бары тэрийэр үлэлэрин ЫБМС кэмииссийэтэ ылынна", - диэтэ Боярова.

Биллэн турар, кыһыҥҥы суоллары бэлэмнээһин күн-дьыл туругуттан тутулуктаах. Ол да буоллар, кыстык суолу көннөрү болдьоҕуттан ый-балтараа ый иннинэ аһарга былаанныыллар. Итинэн сибээстээн, чэпчэки ыйааһыннаах суол техникатын суолу эрдэ оҥорорго бэлэмниир үлэлэри ыытыы оҥоһуллуоҕа. Сибилигин хас биирдии учаастакка мууһу кээмэйдээһин, суолу дьөлүү ыытыллаллар.

Ол курдук, бу күннэргэ Үрүҥ Хайа учаастагар сэтинньи 25 күнүттэн 20 тоннаҕа диэри ыйааһыннаах көлө сылдьар суола үлэтин саҕалыа. Ирдэниллэр үлэлэри түргэтэтиигэ анаан онно МИ-26 вертолетунан икки ДТ-75 бульдозер ыытылыннылар. Бу кэмҥэ суолга чэпчэки техника – бураннар уонна УАЗтар үлэлииллэр.

Итинник курдук суол үлэһиттэрэ Кубэргэнэ – Дружинка боротуохата учаастакка үлэлииллэр, манна ДТ-75 2 бульдозер бааллар. Билигин күөллэргэ муус ортотунан 20 см уонна үрэхтэргэ 18 см халыҥнаах. 30 тонна ыйааһыннаах массыынан сылдьарга муус 61-69 см халыҥнаах буолуохтаах. Ол быһыытынан, кыһыҥҥы суол болдьоҕун биир ый иннинэ сэтинньи 25 күнүгэр аһыллыаҕа.

Итинник эрдэ, сэтинньи 15 күнүгэр, Усть-Куйга – Казачье альтернативнай хайысхатынан суол аһыллыан сөп. Барыллаан ахсынньы бастакы күннэригэр Депутатскай – Сыаганнаах – Үрүҥ Хайа аһыллара былааннанар. «Дьааҥы» көлө суола 25 хонук иннинэ, ахсынньы 15 күнүгэр аһыллыаҕа.

Нижнеянскай – Усть-Куйга хайысха ахсынньы 25 күнүгэр аһыллыан сөп.

Билигин Уус-Ньара – Хонуу «Индигир» кыһыҥҥы суолугар өрүстэр уонна күөллэр кытылларынан үлэлэр ыытыллаллар, бу суол ахсынньы 20 күнүгэр аһыллара былааннанар да, ол эрээри барыта күн-дьыл туругуттан, Индигир уонна кини салааларыгар муус төһө халыҥнык тоҥоруттан тутулуктаах.

Үрүҥ Хайа – Чокуурдаах суола («Индигир») быһа сабаҕалаан 2014 сыл тохсунньу 25 күнүгэр аһыллыаҕа.

Болдьоҕуттан ортотунан 10 хонук эрдэ «Анаабыр» кыһыҥҥы суол Өлөөн – Үрүҥ-Хайа хайысханан 2014 сыл тохсунньу 10 күнүгэр аһыаллыа. «Дьааҥы» Тополинай – Баатаҕай хайысха — быйыл ахсынньы 15 күнүгэр аһыллыа, манан Уус-Дьааҥы улууһугар суол техникатын уонна массыынатын ыытыахтара. Итини таһынан бу кэмҥэ Баатаҕай – Усть-Куйга суола аһыллыаҕа.

Ахсынньы 25 күнүгэр «Арктика» суолун Буруустаах – Үөһээ Халыма – Орто Халыма улуустарын кирбиитэ– Черскэй үс учаастага сылдьарга бэлэм буолуохтара диэн сабаҕаланар.