«Скиф», Чокуурдаахтааҕы балык собуотун, «Чурапчы», «Полюс холода» кооперативтар, Дьокуускайдааҕы килиэби астыыр кэмбинээт, о.д.а. бородууксуйалара быыстапка эргийэр киинигэр буоллулар.

Тыа хаһаайыстыбатын, ас-үөл политикатын миниистирин солбуйааччы  Сталик Дерягин манныкм диэтэ: «Биһиги өрөспүүбүлүкэбитигэр тыа хаһаайыстыбатын бородууксуйатын дэлэтэр тэрилтэлэригэр бу быыстапка саҥа кыаҕы арыйар. Манна атын регионнары кытта дьыалабыай сибээс үөскэтиллэр. Ити түмүгэр Саха сирин аһа-үөлэ өрөспүүбүлүкэни уҥуордаан Россия таһымыгар тахсар кыахтанар».

Москваҕа ыытыллар быыстапкаҕа Саха сирин тэрилтэлэрэ 3 тонна халбаһы, эт, балык оҥоһуктары аҕалла. «Быыстапкаҕа туруоруллар бастыҥ аспытыгар Москва олохтоохторун, ыалдьыттарын болҕомтото куруук муҥутуур улахан», - диэтэ Сталик Дерягин.

Үөһээ Дьааҥы «Полюс Холода» СХПК ураты минньигэс астара дьон биһирэбилин ылыахтарын ылаллар. Маннык быыстапкаларга, дьаарбаҥкаларга тэрилтэ быйыл сэттис сылын кыттар. Кооператив салайааччыта Екатерина Портнягина быыстапка уопуту, сатабылы атастаһыыга улахан кыаҕы үөскэтэрин, саҥа саҕахтары аһарын бэлиэтээн эттэ.

Чокуурдаахтааҕы балык собуотун генеральнай дириэктэрэ Михаил Габышев эппитинэн, собуот быйыл Москваҕа аан бастакытын Аллайыаха сибиэһэйдии тоҥоруллубут балыгын аҕалбыт.

 РФ бырабыыталыстыбатын бэрэссэдээтэлэ Дмитрий Медведев, дойду салайааччылара, регионнар баһылыктара быыстапканы көрдүлэр-иһиттилэр.

Саха сириттэн тиийбит делегация быыстапка дьыалабыай чааһыгар көхтөөхтүк кытынна.