СИА-ҕа «Москваҕа Саха сирин постпредствота» ГБУ генеральнай директорын бастакы солбуйааччыта Алексей Пугачев иһитиннэрбитинэн, күнүс 13 чаас саҕана ведомство куттал суох буолуутун сулууспата түөрт эдэр киһи Егор Борисов хаартыскалаах баннеры постпредство утары Мясницкэй проезд өттүгэр турар «Дом финской одежды» маҕаһыын дьиэтигэр ыйыы сатыы сылдьалларын биллэрбит.

«Бэрэстэбиитэлистибэ харабылын үлэһитэ уонна маҕаһыын харабыллара биллибэт дьон дьайыыларын тохтоппуттар. Эдэр дьон төрдүөлэр эбит. Харабыллар этэллэринэн, кинилэр ортолоругар биир кыыс баар үһү», - диэтэ Пугачев.

Алексей Пугачев быһаарбытынан, баннер икки-үс мүнүүтэ эрэ турбут. Икки киһи ыйыыр кэмнэригэр икки атыттар ону видеокамераҕа устубуттар. Куттал суоһаабытын билэн, хара санаалаахтар буут биллэрбиттэр, кинилэри тутар кыаллыбатах. Куттал суох буолуутун үлэһиттэрэ баннеры ылбыттар. Бу барыта олус түргэнник буолбут, онон ким да көрбөккө хаалбыт.

«Бу быһылаан итинник ааста. Арааһа, эдэр дьон киксэриинэн дьайбыттар быһыылаах», - диэтэ Пугачев.

Хаартыскаҕа көстөрүнэн, баннер ыксалынан оҥоһуллубут. Көстүү хаачыстыбата суох фотомонтаж буолара тута биллэр.

Сантана эттэххэ, Саха сирин президенэ Егор Борисов булт кэнниттэн уон сыллааҕыта түһэриллибит бэйэтин хаартыскатын тула айдааны быһааран биэрбитэ.

Егор Афанасьевич этэринэн, хаартыска чубукуну бултуурга көҥүллэнэр Верхоянскай оройуонугар түһэриллибит.

«Хаартыска кэргэним үбүлүөйүгэр анаммыт кинигэттэн ылыллыбыт. Хаартыска уон сыллаах историялаах, мин ол итинник киэҥ айдааны тардыа дии санаабатаҕым. Бэйэм хаартысканы ураты дии саныыбын уонна киэн туттабын. Ол табыллыбыт бултааһын этэ», - диэбитэ Егор Борисов.

Ону таһынан кини кыыллары сокуон быһыытынан, көҥүллээх бултаммыттара диэн эбэн эппитэ. Хаартысканан ким итинник айдааны тарда сатыырын ыйытыыга Егор Борисов итини соруйан оҥоруу, сорох политическай деятеллэр уонна журналистар бэйэлэрин чопчу сыалларыгар туһаналлар диэтэ.

Москва киинигэр буолбут быһылаан Саха сирин баһылыгын баһааҕырда сатааһын, кырдьык ким эрэ кинини хараардарга кыһалларын өссө төгүл саралаата.