«Балыыһа күнүн» бастакы долгутуулаах биэчэрэ үөрүүлээх быһыыга-майгыга бэлиэтэниэҕэ. Бу күн араас көлүөнэ быраастар, сиэстэрэлэр, бэтэрээннэр көрсүөхтэрэ, кинилэри эҕэрдэлиэхтэрэ, быйыл үлэлии кэлбит эдэр дьону коллективка үөрүүлээх быһыыга-майгыга ылыахтара. Үөрүүлээх мунньаҕы кылаабынай быраас э.т. Мария Уткина уонна кылаабынай бырааһы солбуйааччы Лена Лыткина иилээн-саҕалаан ыытыахтара. Бастакы бырааһынньык сотору кэминэн тахсыахтаах 2 чаастаах киинэҕэ уһуллуоҕа. Атыннык эттэххэ, хас биирдии үлэһиккэ кыһамньылаах сыһыаннаах. саҥаттан саҥа идеялары толкуйдуур, ону дьулуурдаахтык олоххо киллэрэр салалта балыыһа туһунан киинэ устубутун көрүөхпүт.

Аҕам саастаах дьоҥҥо медицинскэй анал көмөнү оҥорор «Өрөспүүбүлүкэ 3 №-дээх балыыһата» эмтээһини сэргэ, араас хабааннаах общественнай үлэни киэҥ далааһыннаахтык ыытарынан кэрэхсэнэр.

Дойду социальнай-экономическай уларыйыыларынан уонна кэм-кэрдии ирдэбилинэн балыыһа аата, үлэтин хайысхата хаста да уларыйбыта. Ол да буоллар, тэриллибит аналын, ылбыт тэтимин, үтүө үгэстэрин ыһыктыбакка кэллэ. Баай историялаах эмтиир тэрилтэ Саха сирин балыыһаларыттан биир бастакынан саҥа сүүрээннэри киллэрэр.

Ол курдук, коллектив салалтата 2009 с. муус устар 9 күнүгэр балыыһа анал эмблематын, аны биир ыйынан «3 №-дээх өрөспүүбүлүкэтээҕи балыыһа» ГБУ Бочуоттаах үлэһитэ» түөскэ кэтиллэр бэлиэни бигэргэппитэ, 2014 с. балыыһа гимнэ баар буолбута.

Эмблема

Бэйэ тус эмблемалаах буоларыгар коллектив ханнык соруктары туруоруммутай?

Бастатан туран, эмблема патриотическай санаа күүстээҕин, түмсүүлээх буолууну, историческай суолталаах балыыһа улахан коллектива биир санаанан салайтаран үлэлиирин туоһулуура саарбаҕа суох. Эмблема эскиһин художник-дизайнер, СӨ доруобуйа харыстабылын туйгуна Герта Рудых оҥорбута.

Эмблема ортотугар баар үөһээ таласпыт дууб от күөх сэбирдэҕэ – олоххо сэргэхтик сыһыаннаһан кырдьыы бэлиэтэ. Үөһээ тахсыбыт саһархай дьураалар медико- биологическай наука салаатыгар научнай-техническэй ситиһиилэри киллэрии көмөтүнэн сэргэхтик кырдьыыны уһатыы. Олоҕу кэрэһилиир от күөх өҥнөөх сэбирдэх РФ уонна СӨ былаахтарын өҥүнэн төгүрүтүллүбүтэ государство аҕам саастаах дьоҥҥо кыһамньытын бигэргэтэр. Эриэн үөннээх чааскы ыарыыттан уонна эрдэ кырдьыыттан медицина харыстыырын бэлиэтиир. Эмблема үөһээ өттүгэр өрөспүүбүлүкэ аата, аллараа тэрилтэ аата суруллубуттар. Эмблема лавр лииһинэн төгүрүтүллүүтэ – үтүө турук, хорсун быһыы уонна кыайыы бэлиэтэ.

«Бочуоттаах үлэһит» бэлиэтэ

Балыыһа салалтата үлэ бастыҥнарын Бочуотунай грамоталарынан, махтал суруктарынан уонна харчынан бириэмийэнэн наҕараадалыыр. Балыыһа атаҕар туруутугар уонна сайдыытыгар улахан кылааттарын киллэрсэн өр сыл үлэлээбит дьон «Бочуот кинигэтигэр» киллэриллэр. Коллектив хас биирдии чилиэнин сөптөөхтүк сыаналыыр, көҕүлүүр туһуттан балыыһа салалтата «Өрөспүүбүлүкэ 3 №-дээх балыыһатын бочуоттаах үлэһитэ» түөскэ кэтиллэр бэлиэ олохтоон, биир идэлээхтэрин үөрдүбүтэ. Бэлиэ эскиһин эмблема ааптара Герта Рудых оҥорбута.

Маннык бэлиэ хаһаайына босхо медицинскэй өҥөнөн туһанар, ол иһигэр сылга биирдэ балыыһаҕа сытан эмтэнэр кыахтанар. Ону сэргэ балыыһа «Бочуотун кинигэтигэр» үйэтитиллэр.

Гимн

Талан ылбыт идэтин таптыыр, ытыктыыр, үлэтигэр бырааһынньыкка курдук настарыанньалаах кэлэр үлэһит хаһан баҕарар коллективынан киэн туттар, кини салгыы сайдарыгар кылаатын киллэрсэр.

3 №-дээх балыыһа хас биирдии үлэһитэ бэйэтин коллективынан киэн туттар диэтэхпинэ, омуннааһын буолбата буолуо. Ону туоһулаан, үйэлэргэ ылланар балыыһа гимнэ күн сирин көрбүтэ. Гимн медицинскэй наука доктора, суруйааччы Валериан Николаев уонна медицинскэй наука кандидата, поэт Виктор Чернявскай тылларыгар, композитор, СӨ искусствотын үтүөлээх деятелэ Владимир Ксенофонтов музыкатыгар суруллубута. Гимни аан бастаан толорбут маҥан халааттаах аанньаллар, биллэн турар, балыыһа историятыгар суруллан хааллылар. Эбиитин балыыһа коллектива таһаарбыт анал брошюратыгар үйэтитилиннилэр.

Бу атыттары үтүө холобурга угуйар сонун хамсааһыннар балыыһа илдьэ кэлбит үтүө үгэстэрин илдьэ сылдьарга, эдэр үлэһиттэри идэҕэ бэриниилээх буоларга, балыыһа анал туругун үрдэтэргэ ананаллар. Дьиҥэр, балыыһа төһө да аҕам саастаах дьону эмтиирин иһин, манна эдэр ыччат куруук баар. Тоҕо диэтэххэ, армияҕа ыҥырыллар ыччат доруобуйатын туругун бэрэбиэркэлэтэ эмиэ бу балыыһаҕа кэлэр. Манна М.К.Аммосов аатынан ХИФУ Мединститутун студеннарын клиническэй базалара баар. Манна ыччат балыыһа бэйэтин музейыгар сылдьыбакка ааспат.