Эмчиттэр, тыылга хаалбыт дьон курдук, Кыайыы күнүн чугаһатар туһугар бэйэлэрин харыстаммакка түбүгүрбүттэрэ. Хас биирдии үлэһит фроҥҥа барарга бэлэм этэ. Аҕа дойду Улуу сэриитин кэмигэр кылаабынай бырааһынан уһулуччулаах хирург Владимир Семенов үлэлээбитэ.

"Биһиги балыыһабытыгар сэрии сылларыгар 300-тэн тахса фронтовик эмтэнэн ааспыта. Бастакы ыарыһахтар номнуо 1942 с. киирэн барбыттара», – диэн билиҥҥи балыыһа кылаабынай бырааһа Борис Андреев кэпсиир.

Бу күннэргэ балыыһа дьиэтин эркиннэригэр Аҕа дойду Улуу сэриитин саҕанааҕы өйдөбүнньүк хаартыскалар кэчигирэстилэр.

Балыыһа кэлэктиибэ сэрии уонна тыыл бэтэрээннэригэр куруук ахсаабат кыһамньытын уурар, кинилэр доруобуйаларын тиһигин быспакка бэрэбиэркэлиир. Балыыһа кэлэктиибэ ыам ыйын 9 күнүн иннинэ ыарыыны сэрэтэр отделениеҕа Аһаҕас аан күннэрин ыытар уонна бэтэрээннэри балыыһаҕа сытыаран эмтиир. Ол туһунан сэрии уонна тыыл бэтэрээннэрэ кылгастык маннык аҕыннылар уонна махталларын тириэртилэр:

Ян Алексеевич Яковлев, 80 саастаах:

– Мин өрөспүүбүлүкэтээҕи 2 №-дээх балыыһаҕа иккис төгүлүн эмтэнэн эрэбин уонна «бэттэх кэлэр ыйаахтаах киһи бэттэх кэлэр балыыһата» диэн бигэтик этэбин. 2007 с. Дьокуускайга эмискэ охтубуппар «суһал көмө» аҕалан турардаах. Наталья Ивановна Чупрова диэн быраас кыһамньылаахтык эмтээн, иккистээн төрөөбүт курдук санаммытым. Бу сырыыбар Наталья Ивановна миигин билбититтэн олус долгуйдум, кинини көрөн үтүөрэргэ эрэлим өссө улаатта. Арай өр сылларга үлэлээбит эмчитим туох да аакка-суолга тиксэ илигиттэн кырдьаҕас киһи хомойо санаатым. Наталья Ивановна бэйэтэ: «Миэхэ туох да аат-суол наадата суох. Бэйэм үлэбин толоробун, онтубунан дьоллоохпун», – диир киһи буолан биэрдэ. Медицинскэй сиэстэрэ Валентина Григорьевна үлэтин-хамнаһын хайгыы көрдүм. Кини күн аайы хас биирдии ыарыһаҕы кытары кэпсэтэр, сүбэ-ама биэрэр.

2007 сыл кэнниттэн балыыһа олус тупсубутун бэлиэтии көрдүм. Кылаабынай быраас Борис Андреев кыһамньылаах дьаһала харахха быраҕыллар.

Иннокентий Михайлович Буслаев, тыыл бэтэрээнэ:

– Бүлүү Сыдыбылын олохтооҕобун, 87 саастаахпын. Эмискэ ыалдьан хаалан, бу сиэним барахсан көрө-истэ сылдьар. Нэһилиэкпитигэр тыыл бэтэрээннэрэ бэйэбит да 3-4 эрэ киһи хааллыбыт. Сэрии кэмигэр килбиэннээх үлэм иһим мэтээллээхпин, нэһилиэк бочуоттаах олохтооҕобун. Үйэм тухары сүөһү көрүүтүгэр үлэлээн кэллим.

Бу балыыһаҕа, миигин, кырдьаҕас киһини эдэркээн кыргыттар-уолаттар эмтииллэриттэн астына сытабын. Ама итинник кыһамньылаах дьон илиитигэр киирэн баран, хайдах үтүөрүөм суоҕай?

Манна киирэн, Кыайыы бырааһынньыга бу кэлбитин уонна балыыһа кэлэктиибэ Улуу Кыайыы 70 сылыгар улахан болҕомтотун ууран, биһиэхэ бэтэрээннэргэ анал стендэ оҥорбуттарын истэн олус долгуйдум. Ыалдьа сытар дьон настарыанньаларын биллэ көтөхтүлэр. Атахпар турдахпына, хас биирдии хаартыска иннигэр сүгүрүйүөм буоллаҕа. Киһиэхэ эмтэниини сэргэ сылаас, истиҥ сыһыан наада диэн итини этэн эрдэхтэрэ.

Түгэнинэн туһанан, биир дойдулаахтарбын, Сыдыбыл дьонун Улуу Кыайыы 70 сылынан эҕэрдэлиибин!