Компьютер, араас программа барыта “урукку” бириэмэнэн олорор буолан, оннооҕор электроэнергия харчытын төлөбүрүгэр уларытыылар киирдилэр. Билигин сорох дьон уот харчытын “күнүскү” уонна “түүҥҥү” тарыыптарынан төлүүр. Алтынньы 26 күнүттэн саҕалаан төлөбүр хайдах ааҕыллыахтааҕын туһунан Энергосбыт Дьокуускайдааҕы салаатын учуокка отделын начальнига Дмитрий Ивановтан ыйыталаспыппытыгар: “Программата уларытыллыбатах счетчик көрдөрүүтэ салгыы даҕаны учуоттаныа. Улахан уларыйыы суох. “Күнүскү” тарыып сарсыарда 7 чаастан буолбакка, 6 чаастан, онтон “түүҥҥү” тарыып киэһэ 10 чаастан (урут 11 чаастан этэ) ааҕыллан барыа”, -- диэн быһааран биэрдэ.

Инникитин туһанааччылар сайаапкаларынан баҕалаахтары биир ставкалаах тарыыпка көһөрүөхтэрэ. Маны таһынан анал тэрилтэлэр уонна Энергосбыт үлэһиттэрэ дьиэтээҕи счетчиктары олохтоох бириэмэҕэ көһөрүөхтэрэ. Сокуон быһыытынан бу өҥө төлөбүрдээх. Холобур, биир фазалаах счетчик программатын уларытыы 865 солк. эбит буоллаҕына, үс фазалааҕа 920 солк.

Онон, эбии ночоокко тэбиллибэт туһуттан, олохтоох бириэмэҕэ сөп түбэһэр саҥа прибордары атыылаһыҥ.