Ол да иһин, ожоговай отделение тэриллибитэ 20 сылын бэлиэтиир научнай-практическай конференцияҕа доруобуйа харыстабылын туйгунун бэлиэтин уонна СӨ Государственнай Мунньаҕын (Ил Түмэн), СӨ Доруобуйа харыстабылын министерствотын наҕараадаларын ылыахтаах дьон үгүстэрэ кыайан кэлбэтилэр. Ол төрүөтүнэн кинилэр өрөбүлү, сынньалаҥы, бэл үбүлүөйдээх дьоро түгэни аахсыбакка, куруук байыаннай балаһыанньаҕа үлэлииллэрэ буолар.

Бу үөрүүлээх дьаһалы СӨ Доруобуйа харыстабылын министерствота, өрөспүүбүлүкэтээҕи 2 №-дээх балыыһа уонна «Мир без ожогов» бүтүн Россиятааҕы общественнай тэрилтэ тэрийдилэр.

Отделение чугас доҕотторо, көмөлөһөөччүлэрэ – Вишневскай аатынан институт ожоговай киинин салайааччыта, термическэй бааһырыы, баас уонна баас инфекциятын кафедратын сэбиэдиссэйэ, профессор Андрей Алексеев уонна Г.И.Сперанскай аатынан Ожоговай киин (Москва) салайааччыта, кафедра профессора Людмила Будкевич«Уокка сиэтиини уонна үлүйүүнү эмтээһиҥҥэ инновационнай технологиялар» диэн оскуола-семинарга кытыннылар. Андрей Алексеев Саха сирин ожоговай отделениетын быраастарын, травматологтарын, ортопедтарын маастарыстыбаларыгар, хорсун быһыыларыгар сүгүрүйэрин биллэрэн туран, түөскэ анньыллар бэлиэлэри, наҕараадалары туттарда.

РМНА Сибиирдээҕи отделениетын биир кэлим медицинскэй проблемаларын научнай киинин дириэктэрэ, м.н.д Михаил Томскай отделение үлэһиттэрин бэйэни харыстаммат үлэлэрин бэлиэтээн туран, отделение бастакы сэбиэдиссэйэ Василий Божедонов уонна кэнники сылларга отделениены салайбыт үрдүк категориялаах травматолог-ортопед быраас Галина Никулинаүлэлэрин сөҕөрүн-махтайарын, кинилэргэ сүгүрүйэрин туһунан эттэ. Саха сиринээҕи медицинскэй институту бүтэрээт, бу отделениеҕа ананан үлэлээн, профессорга тиийэ үүммүтГеннадий Пальшиноччолорго Саха сирин тымныытын тулуйбакка балыыһаҕа киирэргэ күһэллибит омук киһитэ балыыһа аһылыгын аһаабакка «куттаталаабытын», арай Саха сирин үрдүк кылаастаах быраастарын көмөлөрүнэн атаҕар турбутун туһунан аҕынна. Кырдьыга, бу соһуччу түгэн куһаҕаннык түмүктэммитэ буоллар, оччолорго аан дойду таһымнаах быһылааҥҥа кубулуйуо эбитэ буолуо.

«Хотугу форум» аан дойдутааҕы тэрилтэ ситэриилээх дириэктэрин э.т., филологическай наука кандидата Анастасия Божедоновакэргэнин, отделениены тэрийээччи уонна бастакы сэбиэдиссэй Василий Божедонов туһунан кылгас ахтыыны оҥордо.

Уруккута байыаннай госпиталь дьиэтигэр үлэлии олорор ожоговай отделение билигин СӨ Доруобуйа харыстабылын министерствотын уонна өрөспүүбүлүкэтээҕи 2 №-дээх балыыһа өйөбүллэринэн материальнай-техническэй базата кыралаан да буоллар, тупсарыллар. Урут оҕолор улахан дьону кытары бииргэ сытар буоллахтарына, билигин кырачааннары саҥа өрөмүөннэммит балааталарга көһөрдүлэр. Балыыһа дьиэтэ 2016 с. өрөмүөҥҥэ барыахтаах.

Отделение үлэһиттэрэ тыйыс тымныылаах Саха сиригэр термическэй бааһырыыны эмтииргэ сүҥкэн үөрүйэхтэннилэр. Медицинскэй наука доктора, профессор, Рево Алексеев салайааччылаах эмчиттэр бөлөхтөрө термальнай бааһырыыны эмтииргэ үөрүйэхтэрэ федеральнай стандартарга төрүөт буолар толору кыахтаахтар.

Манна сыл аҥара устата сытар ыарыһахтар эмиэ бааллар. Орто степеннээх үлүйүүлээх эбэтэр уокка сиэтиилээх биир ыарыһаҕы эмтээһин төһө сыаналааҕын ааҕан көрбүттэрэ, быһа барыллаан 700 тыһыынча солкуобайга тэҥнэспит.

Быраастар отделение эрэ иһигэр үлэнэн муҥурдамматтар. Оройуон балыыһаларыгар термическэй эчэйиигэ суукканы быһа сүбэ-ама биэрэллэр. Ыарыһахтары куоракка аҕаларга Саахал медицинатын киинин кытары бииргэ үлэлииллэр.