«2030 сылга диэри болдьохтоох Россия тырааныспарын стратегиятыгар муостаны тутуу бырайыага баар. Ону РФ тырааныспарга министиэристибэтэ бигэргэппитэ. Үбүлээһин араас барыйаанын билиҥҥитэ толкуйдуубут. Ону таһынан бырайыагы Росавтодор бэрэстэбиитэллэрин кытта ырытабыт. Билигин бүтэһиктээх быһаарыы хайдах буолбутун этэр эрдэ», - диэтэ Семен Винокуров.

«Үс федеральнай уонна биэс өрөспүүбүлүкэтээҕи суолу Өлүөнэ өрүһү туоруур муоста холбуохтаах. Бырайыак төһөнөн эрдэ олоххо киирэр да, соччонон үчүгэй диэн санаанан салайтаран ону туруулаһабыт», — диэтэ Семен Винокуров.

«Регион бэйэтэ муостаны тутар кыахтаах дуо?», - диэн суруналыыс ыйытта. Онуоха миниистир «Биллэн турар, суох. Бүгүн биһиги дотациянан туһанар региоммут, онон ити кыаллыбат», - диэн хоруйдаата.

Крымы сайыннарар инниттэн бу бырайыагы тохтотор курдук сурах тарҕаммыта. Ол кэнниттэн былаас бэрэстэбиитэллэрэ муостаны тутууну чугастааҕы кэмҥэ көһөрөр туһунан эппиттэрин РФ бырабыыталыстыбатын бэрэссэдээтэлэ Д.Медведев бигэргэппитэ. Медведев муостаны тутуу үбүн-харчытын Крымы сайыннарыыга ыытар туһунан иһитиннэриини олоҕо суоҕун туһунан эппитэ.

Алтынньы саҥатыгар Өлүөнэ өрүһү туоруур муостаны тутуу 2020 сылга диэри уһатыллар диэн буолбута.

Росавтодор салайааччыта  Роман Старовойт эппитинэн, муостаны тутуу тула бүтэһиктээх быһаарыы ылылла илик.«Куонкурус ыытыллыбыта, онон билиҥҥитэ РФ бырабыыталыстыбатын уонна президенин быһаарыыларын күүтэбит», - диэтэ кини.