«Сахатранснефтегаз» ААУо Өлүөнэ түгэҕэр сытар ситими уонтан тахса сыл көрөн-истэн, өрөмүөннээн кэллэ. Хампаанньа салалтата нэһилиэнньэлээх пууннары гааһынан хааччыйыы судаарыстыбаннай бырагырааматыгар 2016 сылга диэри өрүс түгэҕэр сытар бастакы утаҕы саҥардар, өрөмүөннүүр былааны киллэртэрбитэ. Бүгүҥҥү күҥҥэ ону олоххо киллэрэр сыалтан капитальнай өрөмүөн күүскэ ыытыллар. Санатар буоллахха, судаарыстыбаннай сакаасчыт – СӨ Промышленноһын министиэристибэтэ, тутааччы (олоххо киллэрээччи) – «Сахатранснефтегаз» ААУо.

«Сахатранснефтегаз» пресс-сулууспатын көҕүлээһининэн, суруналыыстар бүгүн үлэ хайдах барар турарын миэстэтигэр, Мэҥэ-Хаҥалас улууһун Павловскай сэлиэнньэтин анныгар, тиийэн билистибит.

Учаастак начаалынньыга Иван Иванов үлэни-хамнаһы билиһиннэрдэ: «Бастакы утаҕы саҥардар сыалтан 1040 м уһуннаах учаастагы саҥанан солбуйуохтаахпыт. Эргэ ситими өссө хостуу иликпит, бу түһэриллиэхтээх ситим аттыгар сытар. Ирдэбил быһыытынан, хайаан даҕаны икки утах баар буолуохтаах. Туох эмэ саахал тахсар түгэнигэр иккис утах холбонон ыксаллаах быһыыны-майгыны таһаарыа суохтаах. Билигин 2010 сыллаахха түһэриллибит иккис утаҕынан гаас кэлэн, Мэҥэ-Хаҥалас улууһугар ааһар.

Бүгүҥҥү күҥҥэ 1040 м уһуннаах утаҕы өрүс анныгар сытар траншеяҕа угуу барар турар. Траншеяны 20 м дириҥнээх сиргэ ыйтан ордук кэмҥэ оҥорбуттар. Иһигэр анал буровой убаҕас кутулла сылдьар. Ол ситим кэбэҕэстик сыҕарыйарыгар көмөлөһөр. Билигин мантан биир биэрэстэ тэйиччи сиртэн анал лебедка ситими суон торуоһунан соһор. Оттон бу мантан анал тиэхиньикэнэн көтөхтөрөн биэрэн, ситим сыҕарыйарыгар көмөлөһөллөр. Барыта этэҥҥэ буоллаҕына, икки суукканан ситими өрүс анныгар сытар анал траншеяҕа соһон түһэриэхтэрэ.

- Бастакы утахха холбуохпут иннинэ бэрэбиэркэ ыытыллыаҕа. Ол курдук, салгыны хачайдаан, ситим түһэр кэмигэр алдьаммытын дуу, алдьамматаҕын дуу билиэхпит. Онно барыта этэҥҥэ буоллаҕына, биирдэ холбуохпут. Ол эмиэ бэйэтэ уустук техническэй үлэ буолар», – диэн эттэ Иван Иванов.

Санатар буоллахха, манна Ульяновскайтан «СП ВИС-МОС» ХЭУо-тан 40-ча анал исписэлиис, оттон «Сахатранснефтегаз» ААУо-тан 20 киһи үлэлии сылдьаллар.