ИТАР-ТАСС суруйарынан, РФ правительствотын председателэ Дмитрий Медведев Өлүөнэ муостатын «аан бастакынан турар сорук буолбатах, кэнники да тутуохха сөп» диэбит. Биһиги бырайыакпытын таһынан, өссө Краснодарскай кыраайга тутуллуохтаах “Тамань” порт таһаҕаһы тиэйэр, саамылыыр, сүөкүүр терминалыгар туһуламмыт үбүлээһин букатын да тохтуон сөп. 

Медведев этэринэн, бырайыактары тоҥоруу, эбэтэр көһөрүү харчы тиийбэтиттэн буолбатах. Дьиҥэр, Крымҥа тиийэр харчы бюджекка баар үһү. 

Онтон РФ транспорга министрэ Максим Соколов Өлүөнэ муостата республикаҕа эрэ буолбакка, бүтүн Россияҕа стратегическай суолталаах диэн хайаан да тутары туруорсар. Билигин бүтэһиктээх быһаарыы хайдах буоларын күүтэргэ тиийэбит. 

Санатан эттэххэ,  Суол федеральнай агентствота (Росавтодор) Өлүөнэ өрүһү туоруур муостаны тутааччыларга куонкурус биллэрэн, муус устар ый саҥата  кыайыылаах тэрилтэнэн "(Саха) транспортнай концессията" консорциум тахсыбыта. Куонкурус түмүгүнэн 3 километр кэриҥэ уһуннаах массыына туоруур муостатын 38,942 млрд. солк. суумаҕа тутуохтааҕа. Манна эбии 15,985  млрд. солк. концессионнай сөбүлэҥ быһыытынан ылыахтааҕа. Онон государство бюджетыттан уопсайа 41 млрд. солк. көрүллүөхтээх.