— Өлүөнэ өрүһү туоруур автомобильнай суоллаах муостаны тутуу биһиги республикабытыгар стратегическай суолталаах бырайыак. Дьокуускайга федеральнай уонна регионнааҕы суоллары биир сиргэ түмэр киин буолар.

Бүгүҥҥү күҥҥэ куонкурус үс түһүмэҕэ барыта бүппүтэ. Консорциум "Транспортные концессии (Саха)" ХЭТ бу куонкуруска кыайыылааҕынан ааттаммыта. Бырайыак государство уонна чааһынай партнерство чэрчитинэн тутулларынан, икки сиртэн үбүлэнэринэн уратылаах. Ол курдук, бастакы түһүмэҕин — бырайыактыыр-көрдүүр үлэни уонна тутууну саҕалааһыны концессионер («ТКС»ХЭТ) үбүлүөхтээҕэ, онтон салгыы федеральнай бюджет уйунуохтааҕа.

СР правительствота РФ тырааныспарга министиэристибэтин уонна Росавтодор тэрилтэни кытта Өлүөнэни туоруур муостаны тутуу тула үлэтэ тохтообот. Оннук, оробуочай мунньахтар буолбуттара, быйылгы сорук чопчутук быһаарыллыбыта.

Росавтодор билигин концессионнай куонкурус кыайыылааҕын кытта сөбүлэһии усулуобуйатын ырыталлар. Муостаны тутуу болдьоммут кэмигэр - 2019 сылга тутулларын туһугар «2010-2020 сылларга Россия тырааныспарын систиэмэтин сайыннарыы» тус сыаллаах федеральнай бырагыраама чэрчитинэн үбүлээһин кээмэйэ чуолкайданар.

Россия тырааныспарга министиэристибэтин салалтатынан үлэлиир уопсастыбаннай сэбиэт мунньаҕар үөһээ ыйыллар министиэристибэ салайааччыта  Максим Соколов Өлүөнэни туоруур муоста Россияҕа бүтүннүүтүгэр стратегическай суолталаах көҕүлээһин буоларын чиҥэтэн эппитэ. «Биллэн турар, быһыы-майгы уларыйа турар. Геополитическай, үп-харчы да өттүгэр уларыйыылар суох буолбатахтар, бааллар. Муостаны тутууга анаммыт куонкурустар бу сыл муус устарыгар түмүктэммиттэрэ. Куонкурус кыайыылаахтарын кытта элбэҕи дьүүллэһэбит. Уһук Илиҥҥэ тырааныспар инфраструктурата сайдарыгар биһиги интэриэспит улахан, онон бу бырайыак олоххо киириитин туруулаһыахпыт, туруорсуохпут», - диэбитэ кини.