Ол эрээри уоту үөрүүлээхтик көрсүү сиэрэ-туома аэропорт саалатыгар буолла. Манна олимпиада бэлиэтин ытыс тыаһынан уонна фотокамералар чыпчылыйыыларынан көрүстүлэр, оттон оонньуулар официальнай кууркаларын кэппит волонтердар ыалдьыттары көрдөөх хаһыынан эҕэрдэлээтилэр.

«Биһиэхэ бүгүн улуу түгэн буолла», - диэн Саха сиригэр уот кэлиитин журналистар иннилэригэр лаампаны тутан туран. быһаарда президент. Кини Олимпиада бэлиэтин кытта кэлсибит делегацияҕа туһаайан, Саха сирин олохтоохторо спорду уонна физкультураны олус таптыылларын, омуктарын спордун көрүҥнэрин эмиэ умнубаттарын уонна бэйэлэрин улуу спортсмен-олимпиецтарынан киэн тутталларын эттэ.

«Саамай сүрүнэ — бүгүн республика Сочитааҕы Оонньууларга олимпиецтары бэлэмнээһиҥҥэ көхтөөхтүк кыттар. Алдан куоракка, Россия спордун министерствотын кытта хайыһар базатын аспыппыт, онно бэҕэһээҥҥэ диэри сезон иннинээҕи дойду эр дьон биатлоҥҥа уонна хайыһарга сүүмэрдэммит хамаандалара дьарыктаммыттара», - диэн бэлиэтээтэ Егор Борисов уонна кинилэр усулуобуйаларын олус астыммыттарын эбэн эттэ.

Президент этэринэн, республика Олимпиада уотун көрсөрө сүдү эппиэтинэстээҕин өйдүүр. «Олимпиада уота Саха сирин уонна бүтүн Россия Федерациятын спортара сайдыытын саҥаттан көҕүттүн», - диэтэ республика баһылыга.

Түмүгэр кини уот эстафетата дойду бары регионнарын хабарын, оннооҕор космоска тахсыахтааҕын да иһин, бүгүн ураты сиргэ, Тымныы Полюһа баар сиригэр кэллэ, ол эрээри манна дьон спорка олус сылаастык сыһыаннаһаллар уонна истиҥник таптыыллар диэн быһаарда.

Егор Борисов этиитин кэнниттэн уоттаах лаампаны бэлэмнэммит массыынаҕа көһөрдүлэр уонна Саха Республикатын Сокровищницатыгар аҕаллылар, онно сарсын сарсыардааҥҥа диэри хаалыаҕа. Онтон делегация уоту кытта Мииринэйгэ аттаныа, эстафета онно күнү быһа ыытыллыаҕа, онтон киэһэ Оонньуулар бэлиэлэрэ Дьокуускайга төннүөҕэ. Республика киин куоратын олохтоохторо уоту сарсын, сэтинньи 9 күнүгэр көрүөхтэрэ - 80-тан тахса факелы тутааччылар куорат киин уулуссаларынан, болуоссаттарынан уонна кэрэ-бэлиэ миэстэлэринэн илдьиэхтэрэ. Олимпиада уотун эстафетатын Саха сиринээҕи кэрдииһэ «Триумф» спортивнай комплекс киин аренатыгар анал иһиккэ уматыынан түмүктэниэ. Сэтинньи 10 күнүгэр уоту Магадаҥҥа күүтэллэр.